Fornhagi II

Fornhagi II

21.08.2011

Kassahjólabíll....leit dagsins ljós í dag þegar Auðuni Orra datt í hug að taka gamla reiðhjólið sitt, taka framhjólið undan því og festa svo hjólið aftan á kassabílinn þeirra bræðra. Síðan hjólaði hann um allt og Ævar fékk að sitja í og stýra. Sniðugt apparat og mikið búið að skemmta sér yfir þessari smíð.

Og hænurnar fluttu í bráðabirgðahús í dag þegar hæsnakofinn var rifinn, þar sem hann var á framkvæmdasvæði í hesthúsinu. Nýr kofi er á verkefnalistanum og verða púturnar færðar til í skálanum. Á meðan fá hænurnar þetta fína hús og gömul skúffa fékk hlutverk sem varpkassi í viðbót við þann sem fyrir var.

02.08.2011

Sumarið er tíminn :o) Við erum búin að vera mikið á ferðinni í sumar. Fórum í viku í sumarbústað í Grímsnesinu, ferðuðumst um uppsveitir Suðurlands, fengum allar gerðir af veðri og öskufjúk líka, hittum ættingja og vini og áttum hreint út sagt mjög skemmtilegt sumarfrí. Strákarnir fá að teikna á fyrstu rúllurnar og þá fær nú ímyndunaraflið að njóta sín. Þessi svangi rjúpuungi á síðustu myndinni fór þó ekki með okkur í sumarfríið - vonandi hefur mamma hans séð um að skemmta honum og fæða.

30.07.2011

Ræktað og ræktað. Það er ekki nóg að sá fræi og engin er rekjan þannig að garðúrðarinn hefur ekki stoppað í mest allt sumar. Arnar er þarna á brókinni að færa úðarann...enda komið langt fram yfir miðnætti! Erum búin að háma í okkur alls lags góðgæti úr garðinum okkar í sumar. Jarðaberjaræktunin hefur gengið ljómandi vel og nú er svo komið að þau þurfa stærra "hús" :o) Á ekki einhver gróðurhús til sölu?

21.07.2011

Langa gangan hjá okkur bandýhópnum var farin að þessu sinni frá Gilsbakka í Eyjafirði, inn Skjóldal, yfir Kambsskarð, niður í Þverárdal, yfir ána og gengum niður Hóladal, áðum á Refsstað og enduðum niður við Hóla í Öxnadal. Tókum í þetta rúmar 10 klst., óðum tvær ár og skreiddumst yfir snjó, plástuðum dálítið af hælum og tám en vorum alsælar með daginn. 18 konur gengu þessa göngu og ekki spillti fyrir að þetta var afmælisdagurinn hennar Líneyjar á Tréstöðum sem bauð upp á ískalt freyðivín í ferðalok. Siggi á Steinsstöðum hugsaði vel um "sínar konur" og keyrði okkur fram og aftur eins og þurfa þótti og hlaut ekkert að launum nema skellihlægjandi ferðafélaga sem kunnu sér varla hóf í kætinni.

04.07.2011

Stormuðum upp í fjall í góða veðrinu. Kristinn var í heimsókn og notuðum við tækifærið til að skoða stóran stein (þann brúnleita hér að ofan) sem við erum ekki viss hvenær kom niður út fjallinu en það er í rannsókn :o) Fundum maríuerluhreiður, fallegar plöntur og "tálgusteina" sem bornir voru heim í kílóavís. Kíkið á myndina af Kristni og Auðuni (fyrir miðju efst) og sjáið leynigestinn sem þar gægist inn á myndina.

29.05.2011

Hann Ævar Ottó 5 ára er á leikskólanum Álfasteini og hér er hann uppi á álfasteini! Það er kalt í veðri þó að júní sé að detta á og voru bændur í Fornhaga kappklæddir við útiverkin í dag. Héldum áfram að pota grænmeti (salati, spínati, basiliku og hvítlauk) út í vermireitina okkar, sáðum gulrótum og radísum og settum niður tvær gerðir af kartöflum. Jarðaberjaplönturnar komu vel undan vetri og hafa fjölgað sér um helming frá í fyrra. Settum líka niður eplatré og tvær seljur sem við fengum í afmælisgjöf á dögunum.

28.05.2011

Framkvæmdagleðin er alveg í hámarki þessa dagana og nú erum við að taka í gegn lóðina við húsið okkar. Fengum þrjá vörubíla af mold á staðinn og svo kom Robbi í Litla-Dunhaga og tætti jarðveg, jafnaði úr moldinni og færði grjóthúgur til og frá. Þá er næst að grjóthreinsa, sá og valta. Í leiðinni var tættur nýr kartöflugarður (sem er þó á skilorði þar til á næsta ári) og einnig færðum við vermireitina okkar til og út (þá sem enn voru inni). Í næstu blíðu setjum við niður kartöflurnar og höldum áfram að pota út grænmetinu sem bíður í öllum gluggum eftir að komast út í gróðurkassana okkar. Einnig eiga afmælisgjafirnar okkar eftir að fá samastað í garðinum. Bíðum hlýrri tíma með það.

23.05.2011
Gos - snjór og afmæli!

Helgin var með eindæmum viðburðarrík. Síðasta (vonandi) hret "sumarsins" hefur dunið á okkur undanfarna daga, gos hófst í Grímsvötnum með tilheyrandi öskufalli og þegar þetta er skrifað er aðeins búið að votta fyrir ösku hér hjá okkur en mun meiri aska hefur fallið t.d. á Akureyri þó stutt sé nú þangað. Salatið okkar situr sem fastast í sáðbökkunum í eldhúsglugganum og bíður þess að sumarið komi aftur svo hægt verði að planta því út í vermireitina. Húsið okkar er fullt af blómum og fallegum gjöfum eftir velheppnaða "áttræðis" afmælisveislu um helgina og má segja að sumar afmælisgjafirnar okkar séu ekki í íbúðarhúsum hæfar en má þar nefna kálf, nokkur tré og fl. dásamlegt. Við erum greinilega mjög rík af frábærum vinum og fjölskyldu sem gerði okkur kvöldið ógleymanlegt. Yndislegar þakkir til ykkar allra sem komuð og glöddust með okkur - kvöldið var með ólíkindum skemmtilegt og reyndi vel á raddbönd og dansfimi.

12.05.2011

Málað og málað. Þarna situr húsfrúin á púða og málar strákúst sem gefinn var í afmælisgjöf daginn eftir. Afmælisbarnið kúabóndi og þá var um að gera að hafa bara beljumunstur á kústinum! Bara nokkuð montin af árangrinum :o)

01.05.2011

Fyrsta tréð í Fornhaga II var jarðsett í dag. Það er gullregn sem bjó eitt sinn í Hríseyjargötunni hjá Svanhvíti ömmu Arnars og er nú komið í sveitina. Gullregn er ákaflega fallegt tré sem blómstrar heiðgulum blómum. Þar sem við erum ekki búin að sjá tréð laufgað þá vitum við ekki nákvæmlega hvaða tegund gullregns þarna er á ferðinni. Einnig plöntuðum við einu birkitré og nokkrum græðlingssprotum sem við vitum ekki hvort lifi af...þannig að þeir eru ekki á lista ennþá.

23.03.2011

Tað - það er eitthvað sem við eigum nóg af. Taðið þurrkum við inni á brettum, og eigum orðið þrjá árganga af þessari nauðsynjavöru. Taðið er um 1-2 ár að þorna í gegn en á þeim tíma snúum við því á alla kanta til að þurrkunin verð sem best. Tja ef maður á ekki peninga eins og skít...þá er alla vegana gott að eiga skít sem hægt er að breyta í peninga!

09.03.2011 - öskudagur

Upp er runninn öskudagur og síður en svo ákaflega skír og fagur! Það moksnjóaði og var töluvert frost líka. Sagt er að öskudagur eigi sér 18 bræður og þá erum við nú í verulega vondum málum held ég næstu daga. En þeir létu það ekki veðrið á sig fá hellisbúarnir (Diðrik, Sindri og Auðunn) hér að ofan. Þeir máluðu bæinn rauðan, söfnuðu heilum haug af nammi og sungu eins og enginn væri morgundagurinn. Fengu mikið lof fyrir sönginn og kræktu sér í viðurkenningu í skólanum í gær í söngkeppni sem þar var haldin. Eftir vaska framgöngu var svo haldið á Greifann í pizzu - svona rétt til að slútta bæjarferðinni.

Ævar Ottó hélt sinn dag hátíðlegan í leikskólanum og var þar í hlutverki sjóræningja. Nökkvi vinur hans var lögga og er með honum á mynd 2. Þeir voru slakir félagarnir þegar myndin var tekin enda klukkan ekki nema 8 að morgni.

05.03.2011

Lopapeysuferð í Gásafjöru. Auðunn og Ævar í rannsóknum á bláskel.

21.02.2011

Í ársbyrjun er margt búið að koma uppá. Mismerkilegt og misgott :o) Ævar handleggsbrotnaði í leikskólanum á fyrstu dögum ársins og var í gifsi í þrjár vikur. Síðan kom bóndadagurinn með tilheyrandi rósum og þorrinn gekk í garð. Eftir þorrablót og verulega risjótta tíð á þorra, kom konudagurinn, góa gekk í garð og veðrið lék við menn og dýr. Af því tilefni var keypt kaka ársins 2011 sem er dásamlega góð skyrterta, lítið sæt og frumleg í útliti. Mælum með henni.

05.02.2011

Auðunn keppti á sínu fyrsta hokkímóti um helgina. SA spilaði við Björninn, fjóra leiki (2x20mín), sama daginn og má segja að það hafi allt verið lagt í sölurnar. Þarna á myndunum er Auðunn í ati við þá svörtu (Auðunn með rauðan hjálm) og gekk á ýmsu eins og já má.

28.12.2010

Það eru engin jól hjá okkur nema að púsla svona eins og einu stóru púsluspili. Hér er Auðunn að glíma við 1500 kubba púsl sem hann fékk frá ömmu sinni í jólagjöf. Púslið er 90x60 cm að stærð og fullt af fyndnum atriðum. Það tók okkur tvo og hálfan dag að klára þetta með miklum og góðum nammi- og matarhélum á milli. Skemmtilegt púsl og erfitt, og að myndatökum loknum var því ruslað ofan í kassann aftur og byrjað á öðru 1000 kubba! Litlu jólakertakarlarnir stóðu fyrir sínu á jólaborðinu en þeir hafa sinnt því hlutverki í nokkur ár.

..og svo renndum við okkur slatta líka...svona til að brenna jólanamminu. Ævar fékk snjóþotubretti frá ömmu og það þurfti að smakka á því vel enda úrvals rennsli á hólnum. Þeir bræður flugu í allar áttir af brettunum og mikið hlegið. Svo daginn eftir rigndi og rigndi og þá fór snjórinn enn og aftur.

28.11.2010

Stærð er greinilega mjög afstæð. Hundurinn eyrnastóri en agnarsmái er tíkin Aska, en hún er chihuahua hundur. Þetta hlýtur bara að vera landsins minnsti hundur því hún er sem sagt ennþá hvolpur og þetta kríli getur staðið í lófa á meðal manneskju. Aska var í heimsókn hjá okkur um helgina með Dönu Ýri mömmu sinni. Hvað eggjunum líður, þá höfum við stolt sagt frá því hve hænurnar okkar hvítu verpi stórum eggjum. Dag einn brá nýrra við og kom svona sýnishorn af eggi. Litla eggið vegur 20 gr. á meðan það stærra er 90 gr.

30.09.2010

Þarna eru þær Doppa og Króna. Þær eru 3ja mánaða gamlar kanínur sem eru blanda af venjulegum kanínum og loop. Þær hafa því óvenjustór eyru sem þær sperra upp í loft. Doppa og Króna fá reglulega að fara í fjárhúskróna, sem nú er ekki í notkun, og leika sér með allskonar dót. Það þykir þeim gríðarlega gaman og hafa séð okkur fyrir ótal skemmtiatriðum með alls lags stökkum og spretthlaupum. Auðunn Orri á Doppu, þessa hvítu, og Ævar Ottó á Krónu, þessa þrílitu. Króna er skapmeiri og stappar oft niður annarri afturlöppinni þegar henni mislíkar eitthvað. Þær eru samt báðar ljúfar og meðfærilegar og miklir mathákar. Þrátt fyrir að október sé á næsta leiti hafa þær enn iðagrænt gras, arfa og fíflablöð til að gæða sér á.

03.08.2010

Auðunn og Ævar með sælgætislitaðar tungur. Svo er "liðið" okkar: Sylvía, Gréta, Auðunn, Halldóra og Ævar. Síðasta myndin er af Auðuni í góðu skoti í körfunni :o)
Skemmtum okkur konunglega ásamt 14 þúsund öðrum á Landsmóti UMFÍ í Borgarnesi um verslunarmannahelgina. Fylgdumst með þeim systrum Grétu og Sylvíu á Úlfsstöðum komast á pall en Gréta hlaut gull í 4x100m. boðhlaupi og Sylvía brons í 600m. hlaupi. Þær kepptu fyrir UMSS og vorum við því stuðningsmenn Skagfirðinga í brekkunni. Auðvitað hvöttum við líka okkar fólk hjá UMSE :o) Til hamingju enn og aftur stelpur og stór skemmtilegt mót. Stefnum á Egilsstaði að ári og þá vonandi með keppanda. Auðunn tók smá æfingu á þessu móti og skráði sig í körfuboltaskotkeppni. Komst í þriðju umferð af fjórum og hlaut körfubolta að launum.

27.07.2010

Það var galsi í guttunum enda komið fram undir miðnætti og vatnsslagur í gangi. Það blotnuðu einhverjar flíkur, allt umhverfið og ljósmyndarinn átti fótum fjör að launa :o)

21.07.2010

Hitinn fór vel yfir 20 stig í sólinni í dag og við það tækifæri fóru Auðunn, Aron og Ævar í vatnsslag með garðúðara. Skemmtilegur og hollur leikur sem var í senn ærslafullur og svalandi.

19.07.2010

Hann er efnilegur í markinu sá stutti (Ævar Ottó 4 ára) en þarna tók hann professional á þetta!

13.07.2010

Gengur blússandi vel í matjurtaræktuninni og þarna má sjá lífleg kartöflugrös til vinstri og blandað salat á hægri myndinni. Garðurinn er smár í sniðum ennþá en nú þegar eru afurðirnar orðnar daglegt fóður á diskum heimilsmanna. Dásamlegt að geta bara slitið sér upp ferskt grænmeti með matnum. Snilld.
Næsta sumar á að færa kvíarnar út í þessum efnum og ráðast í enn frekari ræktun. Jarðarberin, þau fáu sem komin eru, gefa til kynna að næsta sumar væri æskilegt að vera með svona 20 plöntur í stað þeirra þriggja sem nú eru :o) Gómsæt blessuð berin og áhuginn á að borða þau er margfaldur á við uppskeruna.

Vermireitirnir okkar tveir í fullum notum og fleiri í smíðum...sem fá þá sitt hlutverk að ári.

Ævar Ottó bakaði þessar bláu muffinskökur í fótboltaformum. Alveg í anda bakarans og ótrúlega góðar.

02.07.2010

Þarna missti húsbóndinn Arnar sig á barnaleikfanginu á bænum. Eftir að vera búinn að spóla um allt á afturdekkinu....tók hjólið á rás enda bensínið í botni og spurning hvort ætti að halda eða sleppa :o) Allt fór þetta vel, hjólið tók sönsum og Arnar var kominn aftur á bak skömmu síðar.

28.06.2010

Þarna fékk Auðunn nýjan hjálm og Ævar naut góðs af því og fékk gamla hjálminn hans Auðuns. Nú verður hægt að hjóla sem aldrei fyrr...og allir hausar vel varðir.

22.06.2010

Auðunn ofurhugi (11 ára) er hér að stökkva á krossaranum sínum. Skíthaugurinn er fínt æfingasvæði alveg þangað til maður spólar sig fastan.....og sekkur....og situr pikk fastur! Auðunn sem sagt sökk á kaf í hauginn og pabbi mátti koma og bjarga málunum. Hann lét það nú ekki stoppa sig og stökk sjálfsagt 100 sinnum til viðbótar eftir þetta.

19.06.2010

Fallegir litir. Salatið með hádegismatnum var ekki af verri endanum. Sumarlegt, bráðhollt og fallegt á litinn. Græni karlinn eða nornin er Ævar í dulargervi. Honum datt í hug að mála sjálfur á sér andlitið grænt og Auðunn kom honum svo til hjálpar og málaði á hann könguló og vef. Ófrýnilegur karlinn!

08.06.2010

Tvær sniðugar myndir. Ef fyrri myndin hún er stækkuð þá sést vel að það er hestur í hestsauganu. Augað er líka með ægishjálm og þessi hryssa sem á augað hefur gefið frá sér nokkur hross með ægishjálm. Á seinni myndinni er sama hryssan að klóra sér. Sjónarhornið sniðugt.

03.06.2010

"Vá hvað maður er þreyttur. Það er brjálað erfitt að hanga svona í sólinni og geispa!"
Fyrirsætan tannprúða er Brynja frá Árbæ :o)

21.05.2010

Opið ginið! Þessi mynd er ótrúleg á margan hátt. Í fyrsta lagi er þarna mynd sem tekin er í gegnum gler af fiski í fiskabúrinu okkar. Annað það að fiskurinn sem sést upp í opið ginið á er stór ryksugufiskur sem húkir dögum og vikum saman inni í kastalanum sínum. Þar hafa hann og hans kerling komið upp seiðum og erum við því með sjálfvirka fiskeldisstöð fyrir ryksugufiska. Smellið endilega á myndina og sjáið gínandi ginið á þessum ófrýnilega fiski sem er þó svo gagnmikill.

19.05.2010
Algjör snilld dagsins er "To Be With You" (Mr. Big) með Kvartettinum Clinton.
Ef þetta er ekki bara dásamlegt comeback: Kíkið hér!
og hér er textinn fyrir áhugasama - veskú!
og og og gítargripin...eru hér!

08.05.2010

Fallegir litir í matnum! Þarna má sjá ferska ávexti, lambakjöt með grænmeti (á leið í eldun) og appelsínutré sem dafnar vel í eldhúsglugganum.

29.04.2010

Sófaborðið okkar gekk í endurnýjun lífdaga í fjórða sinn í gær. Þá var það sprautað eplagrænt með silkimattri áferð. Borðið var blátt með glansáferð áður (eins og skápurinn sem glittir í á myndinni) en hefur líka verið lútuð fura og hvíttað. Borðið sem líklega er um 10-12 ára gamalt er því oft búið að vera "ný" mubla hjá okkur. Þessi eplagræni litur er mikill uppáhaldslitur húsmóðurinnar sem er í óða önn að færa sumarið inn í hús...fyrst ekki grænkar neitt ennþá úti. Fyrir áhugasama þá kostaðir þessi "breyting" heilar 2.200 krónur og 40 mín. vinnu.

10.04.2010

Þann 27. febrúar sl. var skemmtileg skíðaganga í Hlíðarfjalli Í spor Þórunnar Hyrnu. Ég, Líney og Halla tókum þátt í mikilli ofankomu ásamt 100 öðrum konum. Stórskemmtilegur dagur, grillaðar pylsur, búningakeppni og vegleg þátttökuverðlaun voru svo dregin út í lok göngunnar. Frábærlega gaman. Ef þið smellið á krækjuna hér að ofan má sjá nafnalista allra þeirra sem tóku þátt í göngunni. P.s. við Líney og Halla voru dulbúnar sem skíðagöngukonur en fengum þó engin búningaverðlaun :o)

09.04.2010

Á öskudaginn fóru héðan prúðbúnir kappar út í daginn. Ég (Anna) þurfti (eins og undanfarin 3 ár eða svo) að vera á fundi í Reykjvík á öskudaginn og missti því af því að eyða deginum með þeim blessuðum. Ævar Ottó var turtles og hefur notað búninginn sinn óspart síðan á öskudaginn. Auðunn, Sindri og Diðrik fóru dressaðir upp sem munkar. Það voru sveittir foleldrar búnir að eyða fjölmörgum klukkutímum í saumaskap og efnislitanir til að búningarnir gætu orðið að veruleika. Efnið lituðum við fyrir rest með kakói! Strákarnir söguðu sér svo sjálfir út krossa úr krossviði og fengu kaðalspotta um mittið. Þeir hlutu verðlaun í söngvakeppninni í skólanum og voru meira en lítið lukkulegir með sig. Helga og Líney sáu svo um að transporta með þá um bæinn og að degi loknum fór Helga með þá í keilu. Frábær dagur fyrir ungafólkið.

08.04.2010

Á fyrstu myndinni er húsið okkar í vetrarbúningi í lok febrúar. Næst er mynd frá undirbúningi fermingarveislu Elísu Eirar en hún hafði lillablátt þema í veislunni. Ævar Ottó deyr alls ekki ráðalaus þegar hann þarf að sigla nokkrum playmokörlum á milli mottanna á gólfinu (sem eru löndin hans). Þar sem hann sat og snæddi konfekttómata á meðan hann lék sér...breytti hann tómatabakkanum í skip. Síðan jókst farþegaplássið eftir því sem fleiri tómatar lentu í maganum.

25.03.2010

Þarna eru þeir bræður Ævar Ottó og Auðunn Orri. Ævar er búin að græja gamla hjólið hans Auðuns, kominn með hjálparadekk og farinn að spreyta sig á stóru tvíhjóli (að hans mati). Heldur en ekki lukkulegur með sig :o)

16.02.2010

Þeir Auðunn Orri og Sindri í Þríhyrningi tóku sig til og fóru á tveggja daga legonámskeið á Akureyri. Þeir fengu að prufa og hanna allslags tæknilegotæki. Skemmtileg tilbreyting fyrir svona litla karla.

14.02.2010

Ævar Ottó er mikill tónlistarmaður og heldur reglulega tónleika fyrir aðra í fjölskyldunni. Hér er hann annarsvegar um helgina og hins vegar um jólin (seinni myndin) að spila á gítar og syngja. Hann skrifar jafnan sínar nótur sjálfur og eru þær oft ansi frumlegar....með augu, munn og allt :o) Þrátt fyrir frumsamdar nótur eru lögin þekkt og innan um óskasteina og fugla út'í frosti má heyra Guns N´ Roses slagara og fleira í þeim dúr. Það verða því eflaust miklir tónleikar á fjögurra ára afmælinu hans í mars en hann æfir stíft fyrir það.

06.01.2010
Jæja...nú eru rúm þrjú ár síðan eitthvað var sett hér inn. Ætlum að reyna að hafa hér kannski það sem er svona minna fréttnæmt en líka bara okkar og skemmtilega hversdagslegt.

Hér eru vinirnir Ævar Ottó 3 ára og Elísabet 4 ára að spila saman tölvuleik. Það var mikil kæti hjá þeim við hvern sigurinn sem þau unnu á tölvuskjánum. Elísabet er nágranni okkar og býr í Þríhyrningi. Hún var hér hjá okkur í rifjapartýi í byrjun árs, ásamt fleirum, þegar þessi mynd var tekin. Hún er með Ævari á leikskólanum Álfasteini. Þá er mynd af Auðuni Orra, fjúgandi á snjóbrettinu sínu en mikill snjór gerði okkur lífið bæði skemmtilegt og líka erfitt þessi jólin. Nú engin eru jólin án þess að pússla eitt erfitt púsluspil. Anna og Auðunn tóku þetta litskrúðuga 1000 kubba púsl og púsluðu því á rúmum þremur dögum (án þess þó að sitja stanslaust við). Myndin var spegilmynd þeirrar sem var á kassalokinu, sem gerði verkið aðeins seinlegra, en um leið enn skemmtilegra.

01.12.2007

Jólin, jólin, jólin koma brátt..... Þarna fórnaði Arnar sér í kuldann til að prýða bæinn jólaljósum. Húsið varð meira svona eins og lítið piparkökuhús.... :o)

29.08.2007
Fluttum inn!

23.05.2007

Húskofinn okkar nuddast uppávið. Farin að koma nokkur mynd á hann þrátt fyrir að sitthvað snurfus sé eftir. Að utan er eftir að ganga frá þakskegginu, setja sedrusvið í kringum útidyrnar og steypa stéttar. Öllu meira er nú eftir innivið.... :o)