Lög fyrir Hrossaræktarfélagið Framfara
Síðast breytt í mars 2010

 1. grein.

Félagið heitir Hrossaræktarfélagið Framfari. Starfssvæði þess er í Hörgárbyggð og Arnarneshreppi. Félagið er aðili að Hrossaræktarsamtökum Eyfirðinga og Þingeyinga. Heimili þess og varnarþing er hjá formanni félagsins.

 2. grein.

Félagar geta allir orðið sem stunda hrossarækt eða hafa áhuga á framgangi hrossaræktar og hestamennsku á félagssvæðinu.

3. grein.

Tilgangur félagsins er að hlú að áhuga félagsmanna fyrir ræktun, bættri fóðrun og meðferð hrossa. Ennfremur að láta til sín taka varðandi ýmis hagsmunamál hestamennskunar á félagssvæðinu.

 4. grein.

Aðalfund skal halda fyrir aðalfund Samtakana og eigi síðar en 1. apríl ár hvert. Til hans skal boða minnst þremur dögum fyrr, símleiðis eða á annan hátt ef stjórnin telur betra. Á aðalfundi gilda almenn fundarsköp. Skal stjórnin gefa skýrslu um störfin á liðnu ári og leggur fram endurskoðaða reikninga og ræða framtíðar áform.

Þá fer fram kosning stjórnar og varastjórnar eins og getur um í 5. grein. Fundur er lögmætur ef löglega er til hans boðað. Aukafundi skal boða á sama hátt og aðalfundi og skulu þeir haldnir er ástæður teljast til þess.

 5. grein.

Stjórn félagsins skipa þrír menn, kosnir til 3ja ára í senn. Fyrstu tvö árin gangi einn stjórnarmaður úr stjórn hvort ár eftir hlutkesti, þannig að einn stjórnarmaður sé kosinn á hverjum aðalfundi eftir það. Varastjórn skal skipa á sama hátt. Stjórnin skiptir með sér verkum. Tveir skoðunarmenn skulu kosnir til tveggja ára í senn.

Stjórn ræður málefnum félagsins á milli funda. Hún hefur umsjón með fjárreiðum félagsins og ber ábyrgð á þeim. Einstakir stjórnar- eða félagsmenn verða þó aldrei persónulega ábyrgir fyrir skuldbindingum félagsins, nema þeir hafi farið út fyrir umboð sitt. Meirihluti atkvæða ræður innan stjórnarinnar sé ágreiningur um afgreiðslu mála. Reikningsár félagsins er almanaksárið.

 6. grein.

Félagsgjöld skulu ákvörðuð á aðalfundi ár hvert.
Eindagi árgjalda skal vera 15. maí. Ef árgjald er ógreitt á eindaga missir viðkomandi félagsmaður öll félagsréttindi sín þar til árgjald er að fullu greitt. Ef árgjald er ógreitt fyrir áramót, fellur viðkomandi út af félagaskrá og það tilkynnt á næsta aðalfundi. Sama á við hafi félagsmaður sagt sig úr félaginu. Viðkomandi getur ekki öðlast félagsréttindi sín aftur nema að eldri skuld hans við félagið sé að fullu greidd.

 7. grein.

Lögum þessum má aðeins breyta á aðalfundi og sé framkominni ósk þar um getið í fundarboði. Tvo þriðju hluta atkvæða þarf á fundi þannig að tillaga til lagbreytingar nái fram að koma.

 8. grein.

Til slita á félaginu þarf samþykki tveggja þriðju hluta félagsmanna á aðalfundi. Verði félaginu slitið skal stjórnin ljúka skuldaskilum fyrir félagið. Sé um eignir að ræða skulu þær ávaxtaðar hjá Hrossaræktarsamtökum Eyfirðinga og Þingeyinga þar til nýtt félag í sama skyni hefur verið stofnað á starfssvæði þessa. Eigninar renna þá óskiptar til nýja félagsins.

Lög þessi voru samþykkt á stofnfundi félagsins sem haldin var í Þelamerkurskóla hinn 1. apríl 2001 og öðlast gildi er aðalfundur Hrossaræktarsamtaka Eyfirðinga og Þingeyinga hefur samþykkt þau.

Lög Hrossaræktarsamtaka Eyfirðinga og Þingeyinga