|
 - smellið á
textann. Click at the text.
29.08.2010
Ævar hitti Golu í hestahólfinu og tóku
þau tal saman samkvæmt venju. Gola er fengin við
Hreim okkar Gígjars og Hörkusyni og
eru það mikil gleðitíðindi enda höfðum við svona passlega
reiknað með að hún myndi festa fang. En frekar en ekki
fékk hún snemma í vor, þegar við vorum að leyfa Hreim að æfa sig
fyrir sumarið, og kastar því hryssna fyrst á bænum í vor.
Það voru því ánægjuleg spor með hana á Dýraspítalann í
Lögmannshlíð um daginn í sónar, þar sem Elfu og hennar
hjálparliði þótti gaman að sjá hana í svona flottu standi, en
síðast þegar Gola sótti Elfu heim var það spurning um að lifa af
eftir langvarandi veikindi.
..og þarna eru ein 9 stk brún hross á einni mynd! Þannig
að nú er það svart maður og ekkert rautt! Flest folöldin
okkar þetta árið eru brún og það vantar meira að segja eitt
þeirra á myndina. Myndarlegi hesturinn fremstur á myndinni
er Jarl, folald frá í sumar undan Maur frá Fornhaga II og
Álfadísi Orradóttur. Sveppurinn
fallegi faldi sig í grænu grasinu á túninu en núna virðist vera
mikil sveppatíð og óvenju mikið af sveppum af öllum mögulegum
gerðum.
28.08.2010
Þessar myndir af rauðagenginu tókum við í sumar. Það fylgir
þessum blessaða rauða lit hjá okkur mikil ágengni og hafa
hrossin með þessum lit sig þónokkuð meira í frammi en önnur :o)
Þarna eru frá vinstri á fyrri myndinni eru: Gloría 3v. Muggur 3v. og Hildur 2v.
og auðvitað Arnar bóndi. Gloría og Muggur eru bæði
gríðarlega stór miðað við aldur og líka skyld því Gloría er
undan Fló og Muggur undan Maur Flóarsyni.
27.08.2010
Í dag fór Írena í aðgerð við naflasliti.
við tókum eftir því fyrst í vor að það var eitthvað ekki eins og
það átti að vera en vorum að vonast eftir því að þetta myndi
lagast. Það varð ekki svo að það þurfti að sauma gatið
saman og nú er hún í eftirmeðferð heima á húsi.
23.08.2010
Í gær tókum við 3ja vetra tryppin úr stóðinu til fortamninga.
Þau eru síðasti árgangurinn hjá okkur sem ekki hlaut fortamningu
folöldin og því margt nýtt undir sólinni fyrir þau svona í
startinu alla vegana. En Asadæturnar okkar þær Gloría og
Grafík stóðu sig frábærlega fyrsta tamningardaginn sinn.
Þær eru báðar mjög feitar og svona ekki gott að átta sig á
útlitinu fyrr en einhver slatti af fitu verður farin af þeim.
Á myndunum eru þær í fyrsta sinn í taumi. Þær eru báðar
mjög fljótar að læra, treysta manninum vel og erum við mjög
ánægð með þær.
Þarna er Arnar með Gloríu, Flóar og Asa
Kálfholti dóttur. Gloría er ótrúlega
traust og róleg eins og hennar móðurkyn hefur ekki klikkað á
fram til þessa.
Og þarna er Grafík, Hörku og Asa
Kálfholti dóttir. Hún var tortryggin út í flassið hjá
ljósmyndaranum fyrst en svo lét hún sem ekkert væri. Grafík er
svaka flott undir sjálfri sér, mikið framgrip og fótaburður og
mjög stolt stelpa. Ef hægt er að tala um viljaleg hross á
þessum aldri...þá hefur þessi það með sér.
Á meðan á tamningum stóð svaf hvíti kisi vært á hálmrúllu.
Hann er nefnilega heyrnarlaus og lét sér fátt um finnast þó að
verið væri að reka hross til og frá, framhjá honum. Hvíti
kisi er starfsmaður á plani í hesthúsinu og sér um að halda sér
minni boðflennum frá húsunum.
22.08.2010
Þetta þykir okkur nú fullsnemmt til að sjá snjó í fjöllunum!
Eftir langvarandi hita í sumar með tilheyrandi þurrki, fór að
rigna og er nú búið að rigna í nokkra daga. Ekki nóg með
það heldur snarlækkaði hitinn og snjóaði í fjöll í nótt.
Herra ágúst, má benda þér á að þú ERT sumarmánuður!
18.08.2010
Ný hryssa á söluskrá hjá okkur er Isabella frá Snartartungu,
jarpblesótt 7v. undan Þokka frá Árgerði. Isabella er mjög
fríð og faxprúð og þægt reiðhross fyrir hestamenn á öllum aldri.
Við setjum nánari uppl. um hana hér inn á síðuna á næstu dögum.
Fylgist með :o)
14.08.2010
Hryssurnar eru að tínast heim undan stóðhestunum um þessar
mundir. Fló kom heim á mánudaginn, fengin við Gígjari frá
Auðsholtshjáleigu. Fylið stórt og hún mun þá kasta
seinnipartinn í maí á næsta ári. Þarna hittast þeir á ný
félagarnir Auðunn Orri og Janus Flóar og Þorrasonur.
Glæsilegur foli Janus, stór, fallegur, magnaður karakter og
eigandinn Auðunn hæst ánægður með kappann. Það sem skyggir
þó á er að bæði hryssur og folöld eru þónokkuð veik, ljótur
hósti og hor. Það er verulegt áhyggjuefni í sumarlok.
05.08.2010
Haustið er uppskerutíminn. Það nálgast ótrúlega hratt um
leið og ágúst er dottinn á á dagatalinu. Fórum fjölskyldan
og tíndum nokkur bláber í kvöld, svona okkur til skemmtunar.
Eins kíktum við undir eitt kartöflugras, það er nefnilega
eitthvað svo spennandi við að taka upp kartöflur og við gátum
ekki setið á okkur. Lítur vel út með kartöflurnar, þær
hafa dafnað vel og eru stórar og pattaralegar nú þegar.
Eftir mánuð eða svo ættu þær að vera klárar en næsta víst er að
við verðum búin að taka þær allar upp fyrir þann tíma og snæða
einhverjar þeirra með bestu lyst.
04.08.2010
Enn gengum við konurnar í sveitinni af stað og í þetta sinn uppá
Kötlufjall. Kötlufjall er rúmir 989 m. að hæð
www.ffa.is og stikuðum við upp
brekkurnar fyrir ofan Baldursheim og upp Þorvaldsskarð.
Við hrepptum þoku bæði á uppleiðinni og niðurleiðinni og fyrir
vikið misstum við af því að sjá umhverfið í kvöldsólarlagi en
það verður bara skoðað síðar. Niður af fjallinu þarf að
labba eftir mjóum hrygg og var það frekar skrítin tilfinning að
labba niður í svarta þokuna og sjá ekkert nema mjóan, grýttan
hrygg sem virtist snarbrattur. En allt hafðist þetta en
niðurleiðin var mun hægfarnari en uppleiðin. Ferðin tók
okkur 5 og hálfan tíma frá hlaðinu á Baldursheimi þar til komið
var niður í Kálfsskinn. Á myndunum hér að ofan má sjá
útsýnið ofan af fjallinu, fyrir ofan þokuna. Þarna sér inn
Eyjafjörðinn og Arnarnes er þarna fyrir miðri mynd. Að
sjálfsögðu settum við stein í vörðu sem var þarna á toppi
fjallsins og þarna eru á mynd: María Albína, Líney, Sirrý,
Halla, Anna, Ragna Magga, Ásrún og Sunna. Á myndina vantar
Betu á Staðarbakka sem líka var með í för og tók þessar
skemmtilegu myndir. Á myndunum hér fyrir neðan er útsýnið
til norðurs og Hrísey fyrir miðri mynd. Á síðstu myndinni
erum við að prika okkur niður hrygginn bratta og komnar niður
versta partinn og farið að sjá í gróður. Takk, takk
stelpur fyrir skemmtilega ferð og takk Beta fyrir lánið á
myndunum :o)
28.07.2010
Úff - það tók á að ná þessum flóka úr taglinu. Þetta
er hún Nös frá Árholti sem er 5v. gömul. Nös keyptum við í
sumar og hún kom til okkar á dögunum. Í kaupbæti fengum
við þennan fína "staur" í taglinu. Það tók okkur tvö kvöld
og um fjóra klukkutíma að ná þessu úr. En það var hverrar
mínútu virði því hryssan hefði ekki verði svipur hjá sjón með
taglið stýft upp við stúfinn. Ef smellt er á fystu myndina
sést þetta frekar vel. Flókinn var upp eftir öllu taglinu
og lengra upp en myndin sýnir. Á þriðju myndinni er svo þetta
fína og fallega tagl komið í ljós. Það var líka gaman að sjá
hvað hún naut þess að sveifla taglinu eftir þessa hársnyrtingu.
Nös, sem er ótamin og var frekar lifandi þegar hún kom,
snartamdist á öllu saman og var ótrúlega þæg og róleg enda
sjálfsagt miður gott að dröslast með þetta aftan í sér.
Mjög efnileg hryssa, mikill fótaburður og allur gangur.
Stefnum á að temja hana í vetur.
25.07.2010
Sólardagurinn mikli var í dag. Þvílíkur hiti og sól!
Anna notaði daginn í að ganga ásamt nokkrum vinkonum í gegnum
Þorvaldsdalinn. Við vorum 5 sem gengum í einstakri blíðu.
Arnar bóndi keyrði okkur upp að Hrafnagilsá og þaðan vorum við
7,5 tíma heim í Fornhaga. Á leiðinni var miklum tíma varið
í sólböð og fótaböð í ánum og nutum við dagsins í botn.
Góðir ferðafélagar í dag voru Katý, Líney, Hulda og Ásrún.
Á fyrri myndinni hér að ofan er svo mynd af hryssunum okkar fimm
sem komu í gær. Fríður og föngulegur hópur og myndin
frekar fyndin...stór, stærri, stærstur!
24.07.2010
 
Í dag komu 5 nýjar hryssur á bæinn og hér er ein þeirra,
Stjörnudís frá Árholti, 7v. undan Aski frá Kanastöðum (8,44).
Sjörnudís er lítið tamin og langstaðin, mjög feit :o) yndisleg í
umgengni og hin snotrasta hryssa. Myndirnar voru teknar í
kvöld þegar við vorum að snyrta hófa á þessum nýju hrossum og
gefa ormalyf. Auðunn og Ævar tóku Stjörnudísi í smá
hársnyrtingu og kunni hún því afar vel. Þessi hryssa er
til sölu hjá okkur. Nánari uppl. gefur Arnar í síma
893-1579
21.07.2010
Hestöflin voru nýtt í sólinni í dag en þeir frændur Auðunn Orri
(t.v.) og Aron Ýmir (í miðið) áttu skemmtilegan hjóladag í dag.
Þarna var Kawinn notaður til að stökkva og prjóna og eins og
myndirnar sýna voru þeir naskir að láta hjólið keyra á
afturdekkinu einu. Aron er nýbúinn að fá hjól svipað þessu
en það er stærra stell enda má sjá að þetta er í minna lagi
fyrir karlinn :o) Svo óku þeir á hæsta hól og könnuðu
útsýnið.
20.07.2010
Í gær lögðu 12 konur land undir fót og gengum við okkar árlegu
"stóru-göngu". Leiðin sem var farin, var frá rótum
Grjótárdals, sem er þverdalur innarlega í Hörgárdal, þar yfir í
Vatnsdal og komið niður að Hraunsvatni og niður í Engimýri.
Leiðin tók okkur 9 klst. og við fórum hæst í 1219m. yfir sjó en
byrjunarhæð hjá okkur var um 300m. þannig að við vorum að hækka
okkur um 900m. upp úr Grjótárdalnum. Stórkostlegt útsýni,
frábært veður og dásamlegir ferðafélagar. Hvað verður það
betra? Myndirnar hér að ofan tók Ragnheiður Jóna
Ingimarsdóttir og má sjá á fyrstu myndinni þar sem sér ofan í
Vatnsdalinn af hæsta punkti (1219m.), þá er gengið niður
Vatnsdal í átt að Hraunsvatninu og sjást Hraunsdrangarnir þarna
í bakgrunni. Á síðustu myndinni eru Helga J, Erla, Anna,
Ragna Magga, Helga S og Beta að hvíla við Hraunsvatnið.
Erla reyndi að verjast flugunum sem mest hún mátti og setti
grímu fyrir vitin. Takk Jóna fyrir myndirnar :o) og takk
ferðafélagar fyrir frábæran dag.
17.07.2010
Heyskap lokið og tók ekki nema þrjá daga frá byrjun til enda :o)
Þetta árið kaupum við allt hey sem við þurfum og bárum því
ekkert á túnin en nýttum þau til beitar í vor fyrir lambfé og
folaldshryssur. Heyskapinn tók því fljótt af og ákváðum
við að þrífa af tveim túnblettum, svona fyrir útlitið, en stór
hluti eldri túnanna hjá okkur hafa verði tekin undir beitihólf.
Það verður því næg haustbeitin hjá okkur og tvö ný beitarhólf í
boði fyrir hrossin.
13.07.2010
Fækkaði um þrjár hryssur í síðustu viku en þá fóru til nýrra
eigenda þær Eva 3v., Fornöld 4v. og Stör 5v. Eva tók smá
krók á för sína og kom við hjá Þristi frá Þorlákshöfn og fer
þaðan til Þýskalands þegar opnað verður á útflutninginn á ný.
Þá er uppi skrítin staða hjá okkur en við eigum enga 4v. né 5v.
hryssu þessa stundina. Næst þarf því að fara í
innkaupaferð og fylla á lagerinn en þrátt fyrir pestir og
krepputíð hefur eftirspurn eftir hrossum aukist á ný og það er
vel.
09.07.2010
Bræður skruppu á bak í dag á Sóma
sómahest, sem Auðunn Orri á. Pestin er heldur á undanhaldi
að okkur finnst, þó heyrist hósti víða í hrossahópnum en engir
hestar eru hér á járnum og því ekkert verið að brúka hross að
gagni. Strákarnir dustuðu þó rykið af Sóma í dag en hann
hefur heldur ekki farið varhluta af þessum ófögnuði svo að
reiðtúrinn var stuttur enda reiðskjótinn járnalaus og vel í
holdum.
Af öðrum fréttum - kíkið inn á Fornhaga
08.07.2010
Tári frá Hvanneyri er stóðhestsefni sem
við eigum í sameign með Ástu og Bjössa á Hvanneyri. Við
kíktum á kappann á dögunum og má segja að nú sé hann að vaxa í
allar áttir enda aðeins veturgamall. Þrátt fyrir síða
bumbu og gálgalegt útlit er hálsinn enn grannur og langur.
Þetta er mjög fríður foli, stór og afar léttbyggður. Tári er
undan Álfi frá Selfossi og Tíbrá frá Hvanneyri.
01.07.2010
Þarna eru þeir bræður Auðunn Orri og Ævar Ottó með þau
Hreim og Golu.
Á fyrri myndinni er Auðunn að heilsa upp á Hreim. Hreimur
er stóðhestur búsins, sá elsti um þessar mundir eða tveggja
vetra, og hefur í sinni þjónustu 7 hryssur á bökkum Hörgár. Við
erum afar ánægð með hvernig hann þróast og er hann bæði stór og
myndarlegur, gæfur og traustur í öllu viðmóti og mikið gengur.
Frú Gola er þarna í hólfi hjá Hreimi. Hennar líf hefur síður en
svo verði dans á rósum síðast liðið ár og gátum við ekki hugsað
okkur að senda hana að heiman undir hest svo að það var
heimavinnslan sem var látin duga. Ævar er þarna á seinni
myndinni að knúsa hana Golu í stóðhestahólfinu en henni líkar
sérstaklega vel við börn og börnum við hana. Yndislega falleg
sál þessi hryssa.
20.06.2010
Í kvöld fór Ívar í ungfolahólf fram á
Staðarbakka (móbrúni folinn á fyrri myndinni). Þegar
folunum er sleppt í hólfið þarf að koma þeim yfir gamla
timburbrú þar sem áin fellur hvítfyssandi fyrir neðan í þröngu
gljúfri. Það er hálf óhuggulegt að fara yfir brúna og því
tókum við Sóma með og notuðum hann folunum til halds og trausts.
Sómi arkaði margar ferðir fram og aftur yfir brúna og tók með
sér nokkra fola í hverri ferð. Algjör snillingur þessi
gamli höfðingi en Sómi (sá jarpskjótti á myndinni) er 12v.
reiðhestur í eigu Auðuns Orra. Ævar Ottó notaði
hvert tækifæri til að skella sér á bak á milli þess sem Sómi var
í "leiðsögninni". Hér fyrir neðan má sjá það sem gefur að
líta hvoru megin út af margumræddri brú en brúin er eins og áður
segir timburbrú með engum handriðum.
19.06.2010
Í dag fóru svo tvær síðustu hryssurnar okkar undir hest, það
voru þær Sandra og
Álfadís en þær fórum við með undir
Hrímni frá Ósi sem nýverið hækkaði sinn kynbótdóm svo um munaði
er er hann nú með 9,5 fyrir töt og brokk, 9,0 fyrir stökk, vilja
og geð og fegurð í reið. Klárhestur með 8,49 fyrir
hæfileika og 8,32 í aðaleinkunn. Myndirnar fengum við
sendar frá Birnu Tryggvadóttur
www.sporthestar.com -
takk kærlega Birna :o) Myndina af henni Júdit, brúna
folaldinu til hægri, tókum við þegar verið var að sleppa
hryssunum undir Hrímni. Júdit er undan Söndru og Þorra frá
Þúfu. Myndar hryssa og sperrt sem flýgur um á tölti.
18.06.2010
Harka fór í dag undir þennan
stórglæsilega gæðing,
Ljóna frá Ketilsstöðum (8,39) vestur í Skagafjörð.
Myndirnar af Ljóna fengum við sendar frá Olil Amble, takk takk
Olil, en á heimasíðunni þeirra Bergs má sjá margar fleiri myndir
af Ljóna sem og fræðast um menn og bú að Syðri-Gegnishólum.
Kíkið endilega á
www.gangmyllan.is Á síðustu myndinni má sjá
Hörku og Jöldu Þorradóttur. Ef smellt er á myndina má
glögglega sjá að pestin er ekki í rénun því bæði dropaði úr
nösunum á hryssunni og folaldinu. Ekkert hross hjá okkur
hefur þó veikst mikið eða fengið slæman hósta en öll hrossin
veiktust í byrjun maí og virðist ekkert lát vera á. Það er
því nauðsynlegt að fara varlega og reyna að gera eins vel við
hrossin og hægt er. Það má þó segja að við erum stálheppin
með veður og því er þessi ófögnuður kannski á besta tíma hér.
 Fló
fór einnig í dag undir stóðhest. Hún fór undir Gígjar frá
Auðsholtshjáleigu (8,46) en við erum búin að sjá það að það eina
sem virkar á hana er eitthvað Orraættað til bæta upp hennar
óþarflega granna vaxtarlag. Hún hefur nú tvö síðustu ár
eignast afkvæmi með Orragenum, annarsvegar undan Tenóri frá
Túnsbergi og hins vegar undan Þorra frá Þúfu og það hefur
lukkast mjög vel.
Á myndinni má sjá Ævar Ottó klappa Janusi Þorrasyni þegar verið
var að örmerkja hann og gefa þeim mæðginum ormalyf áður en lagt
var af stað austur. Það voru þau
Rikki Hafdal og Kristjana
sem ferjuðu Fló fyrir okkur austur í Bergstaði.
17.06.2010
Allskonar systur! Þssar myndir tókum við allar í blíðunni í dag.
Fyrst er Fornöld 4v. undan Hörku og
Þorsta frá Garði, þá kemur Grafík 3v. systir hennar líka undan
Hörku og undan Asa frá Kálfholti. Á mynd þrjú er Gloría
3v. líka undan Asa frá Kálfholti og Fló,
þá næst Hildur 2v. undan
Álfadísi og Mola frá Skriðu og síðust
í þessari röð er Írena 1v., líka undan
Álfadísi og Leikni frá Vakurstöðum.
Þessar sperrtu "kynsystur" jörp og skjótt eru svo báðar frá
Árholti. Sú fyrri er Hildur (smá vesen á bænum að vera með
tvær hryssur með sama nafninu) 3v. undan Gaumi frá
Auðsholtshjáleigu og sú jarpskjótta er Eva 3v. undan Vin
Illingssyni frá Árholti. Eva er til sölu hjá okkur,
myndarhryssa og fljót að læra. Á síðustu myndinni er
Ísöld 1v. hin dökkgráa undan
Fló og Tenór frá Túnsbergi. Hún
heldur svona meira að hún sé hundur en hestur og er því alveg
við hæl í hvert sinn sem einhver sýnir henni áhuga.
Góðir vinir. Þarna er Ævar Ottó kominn á bak hesti sínum
honum Nið frá Lækjamóti. Niður er 5v. en Ævar 4 ára.
Auðunn Orri og Ævar Ottó eiga Nið saman en hann er rétt reiðfær
enn sem komið er og kom aðeins inn í hrossastússi dagsins en við
það tækifæri voru þessar myndir teknar. Niður verður
væntanlega járnaður síðar í sumar (ef heilsa hrossa leyfir).
15.06.2010
Í kvöld fékk Hreimur, tveggja vetra
stóðhesturinn okkar undan Gígjari og Hörku, loksins að fara í
hryssur. Hann var búinn að fá að æfa sig tvisvar á henni
Golu áður en hann fór í hólfið og var hann því vel meðvitaður um
til hvers væri ætlast af honum. Hann tók því strax til
óspilltra málanna enda tvær hryssur í látum og allt að gerast.
Með honum í hólfið fóru sjö hryssur og áttum við þrjár þeirra
sjálf. Frá okkur fóru þær Gola,
Svala og Ólga.
Hreimur er stór og mikið þroskaður miðað við aldur. Hann
er alhliðagengur með opið og flott ganglag, geðgóður og mjög
meðfærilegur.
14.06.2010
Í gærkvöldi kom grafan okkar heim "víííííí" en hana keyptum við
í vetur og vorum svona að bíða eftir hentugu fari fyrir hana.
Linda systir Arnars bauðst þá bara til að sækja hana fyrir okkur
á trailernum hans Björns bónda síns og má sjá Lindu "driver"
þarna að gera klárt fyrir aflestun. Björn fékk þó að fara
með til skemmtunar og var sérlegur aðstoðarmaður í ferðinni og
sá um að keyra gröfuna niður af bílnum. Takk þið sætu hjú
fyrir þennan stórgreiða. Traktorsgrafan er af gerðinni
Case 580G og er fjórhjóladrifin.
13.06.2010
 
Þá byrjar hringurinn aftur og fyrsta hryssan okkar fór undir
stóðhest um helgina. Við keyrðum suður í Grænhól, til
Gunna og Krissu, og fórum með Brynju
undir Gaum frá Auðsholtshjáleigu. Við fórum líka með hana
Þórkötlu frá Björgum fyrir Simma og Önnu og hún fór líka undir
Gaum. Á Grænhóli var vel tekið á móti okkur. Þau
hjón sýndu okkur glæsilega reiðhöll og hesthús á staðnum og á
myndinni efst til hægri standa þeir Arnar og Gunni og horfa yfir
nýjan keppnisvöll sem liggur rétt við íbúðarhúsið. Á
myndunum má sjá fyrst Arnar teyma Brynju í hólfið og Gaumur
fylgir fast á eftir. Í bakgrunninn má sjá heim á Grænhól.
Gaumur hleypur svo þarna léttur á sér í rigningunni og myndirnar
í neðri röðinni skýra sig sjálfar.
10.06.2010
Janus Þorrasonur lá dauðslakur og leyfði ljósmyndaranum að
klappa sér liggjandi.
Öll folöld komin sem fæðast okkur á þessum bæ. Eigum
reyndar von á tveimur til viðbótar sem eru í hryssum sem við
keyptum og það því svona auka en þær eru ekki komnar til okkar
og því svona utan við kerfið ennþá. En hlutfallið var
aðeins hagstæðara hryssum í vil. Við fengum 7 folöld, 4
hryssur og 3 hesta. Svala var geld og er það í fyrsta sinn
í 13 ár sem það gerist en hún á 12 folöld í röð, alveg frá því
að hún byrjaði að eiga folöld 8v. gömul. Hún er algjör
frjósemismaskína og hefur iðulega haft þann háttinn á að fá í
fyrsta hali um leið og hún fer undir hest. En svona er það
og ekkert folald úr henni þetta árið. Folöldin okkar 2010
eru:
| Jalda
frá Fornhaga II |
F.
Þorri frá Þúfu (8,26) |
M. Harka frá Akureyri (8,13) |
| Júdit
frá Fornhaga II |
F.
Þorri frá Þúfu (8,26) |
M. Sandra frá Hvassaf. (7,81) |
| Jana
frá Fornhaga II |
F.
Geysir frá Árholti |
M. Ólga
frá Svínafelli 2 (7,79) |
|
Berglind frá Eiðisvatni |
F.
Dynur frá Hvammi (8,47) |
M. Lind
frá Erpsstöðum (8,06) |
| Bastían
frá Litlu-Brekku |
F.
Kvistur frá Skagaströnd (8,58) |
M.
Brynja frá Árbæ (8,14) |
| Janus
frá Fornhaga II |
F.
Þorri frá Þúfu (8,26) |
M. Fló
frá Akureyri (7,65) |
| Jarl
frá Fornhaga II |
F. Maur
frá Fornhaga II (7,98) |
M.
Álfadís frá Ásmundarst. (7,78) |
Bastían og Berglindi eigum við 50% hlut í á móti Vigni og Jónínu
í Litlu-Brekku.
Rekstrarfé verður lausafé. Sjá nánar
hér.
08.06.2010
Sumar, sumar....um það bil að koma. Dagarnir undanfarið
hafa verið frekar góðir en enn er norðanáttin köld og leiðinleg
inn á milli. Það skín á okkur jú sólin og engin er askan
en það vantar vætuna. Þarna eru síðbúnir vorboðar á ferð.
Skínandi gulur fífill og graðhestar að leik í sólinni.
Hausmyndin er af Hreim Gígjarssyni 2v. gömlum og á síðustu
myndinni takast þeir á bræðurnir Hreimur
og Ívar.
08.06.2010
Í gær fór í byggingardóm
Maríus frá Hvanneyri
og hlaut frábæran dóm 8,58. Maríus er 4v. Klettssonur í
eigu Bjössa og Ástu
vinafólks okkar á Hanneyri. Kíkið á síðuna þeirra og sjáið
fleiri myndir af Maríusi.
03.06.2010
Það er ekki annað hægt en að dást að þessum fallega fola honum
Jarli. Við sögðum frá því frétt hér neðar að við ætluðum
okkur að ná lýsandi myndum af honum og hér eru þær komnar.
Þessi hestur er stórglæsilegur í útliti. Jarl er undan
Álfadísi og Maur frá Fornhaga II.
Maur er Rökkvasonur og undan henni Fló sem
er einmitt móðir hans Janusar á myndunum hér fyrir neðan.
Það var ekki að ástæðulausu að Auðunn Orri valdi sér að fá
folald undan henni Fló. Hún og
hennar afkvæmi hafa einfaldlega öðruvísi karakter en flest önnur
hross. Það sýndi Janus Auðuni í kvöld þar sem við sátum á
hól og vorum að mynda folöldin. Hryssurnar voru mikið á
ferðinni enda mikil fluga en þrátt fyrir það labbaði Janus í
gegnum hrossin og beint til eiganda síns. Þeir kjössuðu
hvor annan dágóða stund og nutu þess báðir í botn að "snertast".
Fallegur hestur Janus og með þetta verðmæta trausta geðslag.
01.06.2010
Í dag var hryssudagurinn mikli hjá okkur en þá fæddust okkur tvö
merfolöld. Brúna hryssan á fyrri myndunum tveimur er Júdit
frá Fornhaga II, undan Þorra frá Þúfu og
Söndru frá Hvassafelli. Rauða hryssan á síðustu myndinni er
Berglind frá Eiðisvatni. Berglind er undan Lind frá
Erpsstöðum (8,06) og Dyn frá Hvammi (8,47). Berglindi
eigum við til helminga með vinum okkar í
Litlu-Brekku, þeim
Vigni og Jónínu en við leigðum í sameiningu hana Lind, af Ásu
Hólmars á Eiðisvatni, og héldum undir Dyn. Myndina af
Berglindi sendi Ása okkur í dag, takk Ása :o)
31.05.2010
Í dag fékk Auðunn Orri hestinn sinn, Janus frá Fornhaga II,
undan Fló og Þorra frá Þúfu. Janus
er svartstjörnóttur, geggjað flottur (eins og eigandinn segir
sjálfur) og fjörugur kappi. Þessir tvö folöld, Jarl og
Janus eru áberandi fallegust....hefðu reyndar alveg mátt vera
hryssur....en þá hefði Auðunn heldur ekki eignast Janus
sinn...þannig að þetta var bara fínt eftir allt.
30.05.2010
Sveittur dagur! Rákum inn tryppin, klipptum hófa á öllu
dótinu (veitti sko ekki af), gáfum ormalyf, greiddum flóka úr
faxinu á henni Hespu kerlingunni og settum svo alla yngri
deildina í fjallhólfið. Þarna er Ævar Ottó með Mugg sinn
en þeir eru sérstaklega hrifnir hvor af öðrum. Og Hespa
(sú ljósaskjótta) hefur greinilega gleymt að bursta tennurnar!
29.05.2010
Í dag kastaði Álfadís Orradóttir
stórglæsilegum brúnum hesti við Maur frá Fornhaga II.
Þetta er eitt glæsilegasta folald sem fæðst hefur okkur og
verður verkefni næstu blíðviðrisdaga að ná af honum lýsandi
mynd. Gæfur, forvitinn og tignarlegur foli sem hefur
hlotið nafnið Jarl frá Fornhaga II.
25.05.2010
Rétt áður en Hera Björk vann sig upp úr forkeppninni í
Eurovision, kastaði Harka þessari svörtu
hryssu undan Þorra frá Þúfu. Folaldið er stórt og öflugt og
með það mesta hár sem ég hef séð á nýfæddu folaldi. Það er
hrokkinhært :o) Kannski er það Orraættleggurinn sem
skaffar þessa hárprýði en Harka hefur áður kastað svona vel
hærðu folaldi, þó ekki svona mikið, en það er stóðhestsefnið
okkar hann Hreimur undan Gígjari frá
Auðsholtshjáleigu. Þessi stóra, svarta skvísa hefur hlotið
nafnið Jalda, sem merkir hryssa.
24.05.2010
 Í
biðinni eftir fleiri folöldum höfum við komið okkur upp vísi að
matjurtagarði. Robbi í Litla-Dunhaga kom og tætti garð,
síðan var rótast í honum með hrífum og skóflum og MIKIÐ af
grjóti fjarlægt. Sagblönduðum hrossaskít og sandi var svo
bætt í garðinn og um helgina fór ofan í hann kartöfluútsæðið sem
loksins spíraði.
Tveir vermireitir eru komnir í garðinn og tveir aðrir í smíðum.
Ævar og Auðunn fúavörðu nýsmíðina og þótti skemmtilegt í
veðurblíðunni. Síðar í sumar vonumst við eftir uppskeru
af: Kartöflum, graslauk, salati, basiliku, gulrótum, radísum,
spínati, jarðarberjum og rabbarbara. Nú veltur allt á
hlýrra veðri og enn duglegra fólki í matjurtagarðinum :o)
Upp, upp hitamælir!
23.05.2010
Hún Fló okkar er með ólíkindum þægt hross.
Hún er 13v. gömul stóðhryssa sem hefur gefið okkur folöld á
hverju ári frá því að hún var sett í folaldseign. Hún
elskar börn og börn elska hana. Auðunn og Ævar fá að gera
allt við hana sem þeim hugnast. Þarna eru þeir bræður að
skoða hvað það er komið mikið undir hana en hún á að kasta á
næstu dögum við Þorra frá Þúfu. Fló hefur gefið okkur 3
hesta og 3 hryssur, elsta afkvæmið hennar, Maur frá Fornhaga II
(sem nú er sex vetra) hefur hlotið 7,98 í kynbótadómi og að
öllum líkindum fer hann í dóm aftur síðar á þessu ári.
Maur er undan Rökkva frá Hárlaugsstöðum og er mjög efnilegur
vekringur. Við eigum tvær efnis hryssur í uppvexti undan
Fló en það eru þær Gloría f. 2007 undan Asa frá Kálfholti og
Ísöld f. 2009 undan Tenór frá Túnsbergi.
22.05.2010
Þá eru folöldin aðeins farin að rétta úr kútnum.
Brynja hagaljómi er tignarleg með hann
Bastían sinn frá Litlu-Brekku og á hægri myndinni er svo Jana.
Jana er undan bleikálóttum hesti og því vorum við svona á báðum
áttum með litinn en hún er líkast til móálótt. Ólga
kastaði við sama hesti í fyrra móálóttu folaldi svo að það
styður við þetta enn frekar. Bastían er
fljúgandi ganghestur sem fer mest á tölti og skeiði en Brynja
heldur honum vel við efnið því hún er passasöm á karlinn og
heypur hólfið á enda í hvert sinn sem einhver óæskilegur
nálgast.
20.05.2010
Það er ekki auðvelt að byrja lífið í kappi við nornirnar fjórar;
Hörku, Fló, Svölu og Söndru. Það fékk þessi litla móálótta
hryssa að reyna en hún fæddist í kvöld, undan
Ólgu frá Svínafelli 2 og Geysi frá Árholti. Hún hefur
hlotið nafnið Jana og er stór og spræk og voru óköstuðu
hryssurnar mjög áhugasamar um þennan nýja íbúa í hólfinu.
Þurftum við að skakka leikinn þar sem þær Sandra og Svala gerðu
verulega atlögu að Ólgu með nýkastað folaldið og þrátt fyrir
skjót viðbrögð náðu þær að stuða folaldið með brussuganginum.
Sú stutta hálf haltrar því að framan og færðum við Ólgu í annað
hólf þar sem þær sem minna mega sín eru á sinni fæðingardeild.
Það er því ekki sama hryssa og hryssa...og því er nauðsynlegt að
skipta óköstuðu hryssunum eitthvað niður í hólf við köstun,
eftir goggunarröð. Þær eru jú ekki allar jafn blíðar á
manninn og halda mætti, þessar elskur.
19.05.2010
Í kvöld varð spennufall á heimilinu þegar
Brynja frá Árbæ kastaði loksins og það í miðri pestinni.
Hún var svo elskuleg að leyfa okkur nánast að taka þátt í því og
náðum við að kíkja á hana áður en folaldið var staðið upp.
Það fæddist hestur, hvítleistóttur á öllum fótum með einhver
hvít hár í andlitinu :o) Leistarnir eru svona eins og hófhlífar
á öllum fótum og þegar svo vel er lagt í skiptir ekki nokkru
hvort afkvæmið er hestur eða hryssa. Litla hófaljónið er
svo aftur undan Kvisti frá Skagaströnd en kynbótamat á gripnum
er 123,5 stig og brosandi kátir ræktendur og eigendur í Fornhaga
og Litlu-Brekku voru
verulega sáttir við sitt.
15.05.2010
Það er rólegt í hestaheiminum sökum pestar og því hægist á öllu
í kringum hrossin. Seldum þó hana Fold á dögunum og meðan
lífrænir reiðskjótar liggja í pesti eru vélrænir mun sprækari.
Á myndinni til vinstri eru Sindri í Þríhryningi (t.v.), Auðunn í
Fornhaga (í miðið) og Eva í Stóra-Dunhaga (t.h.). Þau
hittust hér hjá okkur og léku sér dagpart á hjólunum sínum.
13.05.2010
 
Það var óendanlega gaman í dag að sjá lömbin leika sér úti.
Myndirnar lýsa þó tæplega fjörinu sem var í þeim þegar þau æfðu
mikil kroppastökk. Enn er mjög kalt í veðri og því ætlum
við ekki að láta féð alveg út fyrr en næsta hitaskeið kemur.
Vonandi verður ekki langt að bíða þess.
09.05.2010
Þrjár á netinu! Þarna eru komnar tvær nýjar hænur á búið
en fyrir var orðin ein eftir kynbótahæna ein mikil, ættuð frá
Efri-Mýrum. Þangað fórum við einmitt í dag og sóttum tvær
til viðbótar. Það er magnað við þessar hænur hvað þær
verpa stórum eggjum. Sjá t.d. eggið hér að ofan sem er
gríðarlega stórt og þungt. Bændur á Efri-Mýrum, Raggi og Sandra,
sendu okkur svo heim með 40 risaegg í nesti og spurning hvernig
heimilislífið verður næstu daga við ef við snæðum öll þessi egg
(he he). En eggin eru væn og hænurnar líka. Spurning
hvað það tekur langan tíma fyrir nýju hænurnar að ná sér eftir
flutninginn og fara að framleiða á fullu.
07.05.2010
Sauðburði lauk hjá okkur í dag (nótt). Ærnar okkar 10 báru
því á 12 dögum og er það nú bara fínt miðað við að ekki voru þær
samstilltar frekar en áður. Það báru hjá okkur 9 ær og
einn gemlingur. Í febrúar var talið í þeim 21 fóstur og
það kom á daginn...fæddust nákvæmlega 21 lömb, öll lifandi og
við hestaheilsu. Þetta var mikið gimbravor því okkur
fæddust 17 grimbrar en aðeins 4 hrútar. Strax farið að stinga út
ásetninginn og verður gaman að mæta þessum mjallahvíta og
kolsvarta hópi í haust (3 svartar gimbrar).
02.05.2010
   
Hjólað í vorblíðunni. Það voru dregnir fram allir
gangfærir fákar í veðurblíðunni um helgina. Auðunn Orri
ræsti Kawann sinn að morgni 1. maí og drap á honum að kveldi 2.
maí :o) Búið að vera mjög gaman og hægt að komast á þessu
litla en spræka hjóli nú um allt enda farin að þorna verulega
jörð. Á fjórhjólinu eru svo Óli, María, Ævar og Auðunn.
Allir lögðust á eitt við að smala hrossum til og frá og þá komu
hjólin sér vel. Velkomið sumar :o) Gengur vel í
sauðburði, 7 ær bornar 15 lömbum og þar af 12 gimbrum :o) Kíkið
á sauðféð í máli og myndum.
Helgin fór í girðingavinnu, sauðburð, hrossarag, gestagang,
fjallgöngu og hjól og aftur hjól.
29.04.2010
Tvær nýjar fullorðnar hryssur hjá okkur. Þetta eru þær
Fold frá Haga, 11v. dökkmoldótt undan Ypsilon frá Holtsmúla og
Ólga frá Svínafelli 17v. móbrún undan Þokka frá Bjarnanesi.
Ólga er sýnd með 7,79 í aðaleinkunn og er með 8,5 fyrir tölt,
hægt tölt og vilja og geðslag. Hún er með 9,0 fyrir stökk
en Ólga er hágeng klárhryssa. Í dómsorði hennar stendur að
töltið sé takthreint og hár fótaburður og mikill fótaburður í
fegurð í reið. Ólga á vonandi eftir að gefa okkur hágeng
hross en þessar hryssur eru báða fylfullar og kasta í vor.
Undan Ólgu er meðal annars Freisting (móvindóttskjótt) sem við
seldum til Þýskalands nú í vetur.
25.04.2010
Sauðburður hófst í dag (nótt). Fengum tvær gimbrar undan
Lambás hinum fagra og Synd okkar. Hér má sjá Ævar og Auðun
með gimbrarnar við mörkun í dag.
24.04.2010
Ísöld, Ívar og
Írena
23.04.2010
Hér má sjá hana Stör frá Jaðri, 5v.
hryssu sem við eigum undan Leikni frá Vakurstöðum. Stör er
hágeng, geðgóð og auðveld hryssa. Hún hefur einungis verið
tamin núna í vetur (í fjóra mánuði þegar þetta er ritað) og er því ári á eftir... Stefnum með hana í
dóm síðsumars 2010. Knapi á Stör er Björn Einarsson á
Hvanneyri.
22.04.2010
Gleðilegt sumar!
18.04.2010
Helgin einkenndist af rakstri folalda enda tókum við á hús
síðustu 3 folöldin okkar þau Ívar, Írenu og Ísöld og gáfum þeim
einnig ormalyf. Hér fyrir ofan er Ívar undan Glym frá
Innri-Skeljabrekku og Hörku frá
Akureyri. Ívar er móbrúnn, mjög stór og sprækur foli.
Þá eru næst myndir af henni Ísöld sem er undan Tenór frá
Túnsbergi og Fló frá Akureyri. Ísöld
er stórundarlegt hross :o) Hún er fádæma þæg og traust og
leyfir okkur að gera allt mögulegt við sig. Ævar, 4 ára,
settist á bak henni og það hafði engin áhrif á hana...ekki
frekar en annað...svo sem raksturinn eða leikfimsæfingar með
Arnari! Ísöld kom okkur verulega á óvart með útlit þegar
hún hafði verið svipt loðfeldinum og er mun fallegri en okkur
hafði þótt hún hingað til. Ísöld er steingrá, mikið geng
og rúm hryssa með einstakt geðslag.
Hér eru folöldin svo öll fjögur á stalli. Nútíð er búin að
vera inni hjá okkur í þó nokkurn tíma en hin þrjú komu á hús í
gær. Rauðblesótta hryssan á myndunum er svo Írena undan
Leikni frá Vakurstöðum og Álfadísi frá
Ásmundarstöðum. Gleymdum að taka prívat myndir af
henni...og bætum úr því von bráðar :o)
Á laugardaginn komu þeir svo í heimsókn til okkar, akandi á
fjórhjóli, feðgarnir á Ósi þeir Hjörvar og Nökkvi. Hér er
Nökkvi með Ævari að skoða hænuna okkar, sem býr ein..greyið,
eftir að sambýlishæna hennar gaf upp öndina fyrir nokkrum vikum.
Samt sniðugt að segja að hæna hafi gefið upp önd!
15.04.2010
Í dag fóru þau Skotta og Tígull til Reykjavíkur, á leið sinni
til Evrópu þann 21.apríl n.k. en það getur nú brugðið til beggja
átta með flug þannig að það verður að koma í ljós hvort sú dags.
stenst, sökum öskufallsins úr Eyjafjallajökli. Fækkar um tvö á
stalli og fer að verða pláss fyrir folöldin inni (loksins) en
það er orðið löngu tímabært að taka undan hryssunum okkar (sem
þegar hefur ekki verði tekið undan) sem enn mjólka eins og kýr í
fjósi.
09.04.2010
Þarna er Skotta frá Árholti að hljóta sína fortamningu.
Skotta er á fjórða vetur en hún hefur verið seld utan og fer í
læknisskoðun á mánudag. Öll hross eldri en veturgömul
þurfa að vera vel bandvön þegar þau fara í útflutning og því
þarf að temja eilítið áður en hægt er að senda þau frá sér.
Þarna sannast enn og aftur að fortamning á folöldum og tryppum
marg skilar sér og þá þarf maður ekki að standa frammi fyrir
þessu síðar. Skotta er ákaflega auðveld og þjál hryssa með
glæsilegt útlit. Fífilbleikhöttóttskjótt, blesótt.
09.04.2010
Hillur og spíruð fræ! Það er ýmislegt brasað þessa dagana
og páskarnir voru vægast sagt þétt setnir í ýmsu stússi með
stórfjölskyldunni svo sem fermingu og fleiru. Á skírdag settum við upp stóran
hilluvegg í geymslunni okkar í hesthúsinu, eina 3,6 lengdarmetra
af 60cm djúpum IKEA Gormhillum sem náðu alveg upp í loft.
Þarna fáum við heilmikið geymslurými fyrir allslags
langtímageymsludót sem annars hefur þurft að dúsa á gólfinu á
brettum. Viku fyrir páskana forsáðum við svo böns af
matjurtafræjum svo sem tvennslags salati, basiliku og graslauk.
Salatið þaut af stað og brátt verðum við að færa það í
gróðurpotta sem það fer svo í út í garð þegar hlýnar.
Arnar fór svo eina hestakaupaferð og keypti slatta inn í
hrossahópinn. Segjum frá því síðar.
08.04.2010
Hér er komið inn myndband af henni
Nútíð okkar frá Árholti.
04.04.2010
Gleðilega páska þið öll! ...já og mamma...til hamingju með
daginn ;o) Í tilefni dagsins hlaut amma Jóna tónleika í gjöf
frá þeim Auðuni (á trompet) og Ævari (á gítar). Einnig
voru máluð egg úr kynbótahænunni okkar til að skreyta
páskaborðið og blómstrandi páskalilja prýddi það svo enn frekar.
21.03.2010
Það kom að því! Í dag var brostið í að taka út úr gólfinu
á inniaðstöðunni hjá okkur. Til þess mætti vösk sveit
manna og véla. Gísli í Þríhyrningi kom á lodalnum á
Tréstöðum, Siggi í Brakanda kom á bobcatinum á Björgum og Arnar
verkstjóri var á skóflunni. Síðan var híft og mokað og
brasað og á ótrúlega stuttum tíma var steypta stéttin í miðjum
skálanum komin út undir vegg, eitthvað af jarðveginum líka og
hægt að fara að gera gólfið klárt fyrir mýkra yfirlag.
Gólfið var sem sé dýpkað og því hærra til lofts en áður var.
Algjör snilld þegar þetta verður klárt þó í smáum stíl sé.
Þökk til ykkar allra sem ýmisst lánuðu okkur tæki og tól eða
mættu á staðinn til vinnu. Frábært framtak.
15.03.2010
Snyrtidagur. Jæja, þá fengu þau rakstur Gola, Hrímnir og
Hreimur í dag. Rakað undan kviði og faxi (þar sem það var
þá þegar ekki búið) og Gola fékk einnig rakstur í kringum tagl,
eyru og á enninu (undan toppnum). Ævar fékk sér svo koll
og pússaði Hreim í bak og fyrir en folinn stóð hinn spakasti og
naut félagsskaparins við litla hestamanninn.
14.03.2010
Snjór og rjómablíða. Skarði var sóttur í útiganginn enda
leggur hann á stað til nýrra eigenda í Þýskalandi í dag með
viðkomu fram á haust í Borgarfirðingum en það er gott að taka
svo stórt stökk í lífinu í áföngum. Færðum um leið
geldhrossunum nýja bætiefnafötu en það var greinilega þörf á því
enda var "biðröð" í góðgætið. Á síðustu myndinni eru vinkonurnar
Hespa, Hildur og Hnota. Þær eru allar jafn gamlar (fæddar
2008), hafa verði saman frá því folaldshaustið og eru órjúfanleg
heild. Það einkennir þær margt það sama, gæfar, forvitnar
og faxprúðar. Dásamlega skemmtilegar allar þrjár og það
sniðuga við þær er líka að þegar þær fara sama "út að skokka" þá
renna þær allar á tölti með flottum fótaburði.
09.03.2010
Ótrúlegt tryppi hún Freisting! Á laugardaginn rákum við inn stóðið í
slagveðurs rigningu og roki. Klipptum hófa á stóðhryssunum og
létum þær síðan bíða af sér veðrið inni. Aðallega vorum við þó að taka
hana Freistingu frá Árholti úr hópnum, þar sem hún er seld
erlendis og þurfti að fara í læknisskoðun og það fulla skoðun
með myndatöku og öllu slíku. Það var babb í bátnum því
hryssan er einungis 3v. gömul og algjörlega óbandvön. Því
var hún tekin og "tamin" á laugardaginn :o) Settur á hana
múll, teymd og strokin öll í bak og fyrir. Það var alveg
með ólíkindum hvað hún var móttækileg fyrir þessu öllu saman og
í dag, þriðjudag, fór þessi elska í bæinn og stóð sig með stakri
prýði í læknisskoðuninni. Algjör snilld þessi hryssa og
það er sjaldan sem fer allt saman; útlit, fótaburður, litur og
kyn :o) Á mánudaginn leggur hún svo á stað í sitt ferðalag ásamt
Skarða, móálóttskjóttum, sem einnig er seldur utan.
08.03.2010
Kíkið á hross til sölu og sjáið þær
Nútíð og Skottu sem þar eru komnar á sölusíðuna okkar.
05.03.2010
Þessi leirljósa fallega hryssa heitir Nútíð frá Árholti og er
fædd 2009. Nútíð er stór og léttbyggð, með langan og
fallegan háls. Hún hreyfir sig pattaralega og lyftir mjög
vel fótum. Brokkar og dettur í flott tölt en þessi hryssa er
alhliðageng, skrefstór og hágeng. Frábært útlit og gott
geðslag. Nútíð er sammæðra Væntingu (8,03), Orku (8,01) og
Sælu (7,95) öllum frá Árholti. Móðir hennar hefur því
gefið gott og því er nú nokkuð á vísann að róa með þessa hryssu
sem er mjög spennandi á margan hátt. Kát og skemmtilega
hryssa hún Nútíð.
22.02.2010
Þarna er betri mynd af Gaumsdótturinni en þessi hryssa er mjög
gangmikil, alhliðageng með mjög góðan fótaburð. Ætti að
geta hreyft sig fallega á járnum :o) en það er ekki komið að því
enda bara þriggja í vor.
21.02.2010
Þessar skemmtilegu myndir tókum við í dag af tveimur af nýju
hryssunum okkar. Sú móvindóttskjótta '07 er stórglæsileg
hryssa með mikinn fótaburð. Gengur brokk og tölt með miklu
rými. Fífilbleikskjótta, blesótta hryssan er á fjórða vetur,
mjög myndarleg og faxprúð og brokkar skörungslega. Þessar
hryssur eru til sölu hjá okkur. Sjá nánar hér uppl. um
Skottu frá Árholti, þá
bleikhöttóttskjóttu.
20.02.2010
Í gærkvöldi fengum við ein 5 ný hross til okkar sem við
versluðum fyrir skemmstu. Þessi tryppi á myndunum eru á þriðja
og fjórða vetur. Geldingur brúnsokkóttur og blesóttur (með hvíta
rönd eftir bakinu), móvindóttskjótt hryssa, rauðjörp Gaumsdóttir
(Auðsholtshjáleigu), fífilbleikskjótt blesótt hryssa og einnig
keyptum við leirljóst merfolald sem vantar þarna mynd af. Allt
vel ættuð hross og hreyfingamikil. Spennandi efniviður og
öll til sölu. Uppl. um þau gefur Arnar í síma 893-1579
18.02.2010
Einn kemur þá annar fer. Í gærkvöldi fengum við þennan
nýja hest að sunnan. Þetta er Tígull frá Bakkakoti, 7v.
rauðstórstjörnóttur geldingur undan gæðingshryssunni Nælu frá
Bakkakoti sem er ein besta tölthryssa landsins (9,5 fyrir tölt í
kynbótadómi) enda ísl.meistari í tölti 1994. Næla er svo
aftur undan Sælu frá Bakkakoti, og því sammæðra Sæ frá Bakkakoti. Faðir
Tíguls er Glóðar frá Reykjavík (8,34). Tígull er fallegur,
þægur og traustur í allri umgengni. Smellum af honum
myndum í reið þegar birtir ;o)
18.02.2010
Sólroði flaug til Þýskalands í gær, öskudag. Þessi fallegi og
þægi hestur er 6v. gamall, undan Bjargþóri frá Blesastöðum
(8,30) og Stroku frá Efri-Þverá sem er einnig móðir Stirnis frá
Efri-Þverá (8,15). Það er
Horse Export, Gunnar
Arnarson ehf. sem flytur Sólroða út eins og önnur hross frá
okkur undanfarið. Kíkið á heimasíðuna þeirra og sjáið m.a.
glæsilega alsystur Gígjars, Gyllingu frá Auðsholtshjáleigu.
13.02.2010
Arnar gaukar þarna góðgæti að unghrossunum. Þau eru flest
mjög gæf og meðfærileg enda mikið umgengin og flest fortamin.
Ljósaskjótta hryssan er Hespa '08, þá er
rauðglófextstjörnótt stórglæsileg hryssa, Gloría '07, undan Asa
Kálfholti og Fló, glittir í hausinn á Mugg
'07 hans Ævars (mjóbeslóttur) og aftan við Arnar er Niður frá
Lækjarmóti '05. Móálóttskjótti geldingurinn á hinum tveim
myndunum er Skarði (sjá næstu frétt hér fyrir neðan).
Þessi hestur er til sölu hjá okkur en við höfum ekki náð að taka
myndir af honum í reið en það væntanlega stendur til bóta.
Uppl. um Skarða gefur Arnar í síma 893-1579
09.02.2010
Nýr hjá okkur er Skarði frá Skarðaborg. Skarði er á fimmta
vetur, risastór (153 cm. á bandmál), móálóttskjóttur, þægur og
reiðfær foli. Skarði er gæfur og indæll í allri umgengni.
Hoppuðum aðeins á bak á hann og settum hann svo í stóðið þar til
losnar pláss en á næstu dögum ætti hann að komast inn þegar
Sólroði fer til Þýskalands. Það eru sem sagt reglulegar
ferðir úr Fornhaga til Þýskalands :o)... já og Danmerkur.
Svona er hestalífið bara. Skarði er undan Væng frá
Gauksmýri og Báru frá Hrafnagili sem er móálótt og af gamla
Hrafnagilsstofninum hans Hjalta Jósefssonar. Synd að þessi
hestur hafi ekki verið hryssa, frábær litur, þægð og útlit.
07.02.2010
Fórum á Hvanneyri um helgina að líta á hana Stör okkar frá
Jaðri. Stör hefur verið í tamningu hjá Birni Einarssyni
udanfarna tvo og hálfan mánuð (fyrst í einn mán. í haust og svo
einn og hálfan nú í byrjun vetrar en hún var bara bandvön fyrir
þann tíma). Þessi hryssa kemur okkur frekar á óvart.
Hún er alþæg, mikið hágeng og svona alveg eins og manni gat best
dottið í hug með hana blessaða. Algjör draumahryssa sem er
svo lítið tamin en mjög efnileg. Öll "setning" eftir, hún
blandar öllum gangi og sveiflar löppunum í allar áttir með þessu.
Tamningamaðurinn sagði að hún hefði nú samt átt óvenju óákveðinn
dag þarna og því hlakkar okkur mikið til að sjá hana síðar í
vetur. Yndisleg í alla staði, þæg, traust, hágeng og
jákvæð. Stör er undan Leikni frá Vakursstöðum og Stiklu
frá Kjartansstöðum.
Þessi sæti skjótti hestur er hann Tári okkar
frá Hvanneyri. Tári er folald frá í sumar, undan Álfi
frá Selfossi og Tíbrá frá Hvanneyri. Tára eigum við til
helminga með Bjössa og Ástu á Hvanneyri. Þessi foli er
ótrúlega myndarlegur, hálslangur og tignarlegur. Lofar
mjög góðu og eigendurnir stoltir af gripnum :o)
05.02.2010
Þessa gömlu mynd rakst ég á þegar ég var að grúska í
myndasafninu mínu. Þessi mynd er tekin árið 2001 í
Þorvaldsdalsrétt en þarna eru þeir Grétar Geirsson (pabbi að
járna), Jón Pétur í Staðartungu (heldur fæti) og Ingólfur á
Dýrfinnustöðum (heldur í hrossið) að járna hest. Þeir voru
á hestaferð um Norðurlandið, með túrista, og voru nýkomnir í
gengum Þorvaldsdalinn á leið sinni fram í Staðartungu. Það
skemmtilega við þessa mynd er að þarna er Fornhagaöxlin og "efra
landið" okkar í baksýn en við keyptum ekki Fornhaga fyrr en
haustið 2005 og því algerir útlendingar þarna á þessum tíma.
31.01.2010
Loksins koma hér myndir af Lómi frá Eiðisvatni en við höfum
verið fádæma léleg að mynda undanfarið og því voru faxlausar
hausmyndir það eina sem hann hafði fram að færa á þessum vef.
Lómur er mjög stór. Hann mælist 151 cm á bandmál og er
skrefastór og með svifmikið brokk, töltið laflaust og hefur
mikið og gott afturfótaskref. Þessi hestur gefur von um
bæði fótaburð og rými en mikil vinna er eftir í honum enda
einungis á fimmta vetur.
Lómur er undan Krafti frá Bringu (8,55) og Lind frá Erpsstöðum
(8,06).
28.01.2010
%20of%20imatolt_small.jpg)
Á dögunum hélt Framfari sína árlegu folaldasýningu og um kvöldið
"nýárshitting". Við fórum með þrjú folöld á sýninguna:
Ísöld, Írenu og Ívar. Ívar komst áfram um einn reit og
fékk að fara í undanúrslit en þær stöllur fóru á stökki allar
ferðirnar fram og aftur og heim með skömm í hattinn. Það
var pínu synd að þær skyldu nú ekki rekja úr sér, því þó að
hvorug þeirra sér falleg þá eru þær báðar alveg vaðandi gengar
og lyfta vel fótum. Um kvöldið voru svo veittar
viðurkenningar fyrir árangur í ræktunarstarfinu og hlaut Auðunn
Orri verðlaun fyrir að rækta hryssuna Ímu frá Akureyri (undan
Svölu og Hágangi frá Narfastöðum).
Íma hlaut 8,07 í aðaleinkunn í dómi sl. sumar. Eigandi
hennar er Óli G. Jóhannsson en sýnandi Þorbjörn Hr. Matthíasson
(einnig knapi á mynd). Á myndinni lengst til hægri er
Auðunn með Ímu sína vorið 2004. Þá var Íma veturgömul og
Auðunn 5 ára :o)
27.01.2010
Í dag fór Júlía frá Syðri-Sandhólum til Reykjavíkur og heldur
þaðan áfram til Þýskalands í byrjun febrúar. Júlía er
undan Þokka frá Árgerði og Baldursdótturinni Hind frá
Syðri-Sandhólum.
24.01.2010
Betra seint en aldrei, segir máltækið. Hér eru síðbúnar
myndir af henni Brynju okkar (og
Vignis og Jónínu) þegar
eigendur hennar tóku loka reiðtúrana á henni í ágúst, áður en
dregið var undan og hún sett í folaldseign. Brynja er
ótrúlega skemmtilegt hross. Hún er kvik, næm og viljug og
pínu eldfim :o) Anna var í skýjunum eftir að hafa þeytt henni
eins og góðu götuhjóli eftir veginum :o) en Vignir í
Litlu-Brekku hafði einnig prófað hana vel, tekið í alla gírana
og látið hana m.a. flugskeiða. Brynja kastar fyrst af hryssunum
hjá okkur, við Kvisti frá Skagaströnd.
17.01.2010
Stór hrossaræktarbú þurfa auðvitað að fjárfesta í auglýsingum
til að koma sér á framfæri (he he). Þannig lögðum við í
mikinn kostað við að útbúa og auglýsa á forláta Forddráttarvél
sem Atli "bróðir" á...og mun rölta um gólf
Top Reiter reiðhallarinnar við jarðjöfnunarstörf. Það er
allavegana hægt að segja að þetta sé auglýsinga(her)ferð...þar
sem hún er sjaldnast á sama stað ;)
12.01.2010
Gola kom í snýkjuheimsókn til Ævars (nánast inn um
eldhúshurðina). Ævar bauð henni bita af gulrótinni sinni
sem hún þáði reyndar ekki. Þá sótti hann brauðsneið, sem
hún þáði með þökkum. Ljósmyndarinn færði henni svo fulla
lúku af Havrefraskoddum (sem oftast eru í morgunverðarskálum
heimilismanna) og það þótti henni algjört sælgæti. Gola
fékk sem sagt frískan göngutúr í myrkrinu og smá gott í gogginn
í leiðinni.
10.01.2010
Þarna gefur að líta þrjú ný hross hjá okkur. Fyrsta myndin
ef af Hrímni frá Eiðisvatni (með Arnar á baki), hestur á sjöunda
vetur undan Gára frá Auðsholtshjáleigu (8,63) og Lind frá
Erpsstöðum (8,06). Hrímnir var sýndur 5v. gamall í
kynbótadómi, þá graður, og hlaut 7,72 í aðaleinkunn. Hann
er nú geldingur, mjúkgengur og mjög faxprúður. Hann er
alhliðagengur og verður reiðhestur Arnars. Næstur er Lómur
frá Eiðisvatni (rauðtvístjörnóttur), líka undan Lind (8,06) og
svo undan heimsmeistaranum Krafti frá Bringu (8,55). Lómur er á
fimmtavetur, var frumtaminn 4v. og er svona reiðfær +/-.
Lómur er stór og mikill sláni, lítið hárprúður og skrefastór.
Hann er pínu eins og frekur krakki og lætur sér fátt um finnast
þegar knapinn er annars vegar :o) Lómur verður "Önnuhestur" sem
sleppur þá jafnframt við alla hárvinnu (he he). Gráa
hryssan með stallmúlinn er svo Dokka frá Mófellsstaðakoti.
Hún er á sjöttavetur, var gerð rétt rúmlega bandvön á
fjórðavetur en hitti svo ekki fólk í vel á annað ár :o)
Dokka er undan Gauki frá Innri-Skeljabrekku (8,01) og kippir því
tæplega í föðurkynið þegar henni er lýst sem hreyfingamikilli
skessu! Ekki má gleyma því að hún er sem sagt systir Glyms
frá Innri-Skeljabrekku (ha ha) en þessi frasi var nú lengi í
tísku....það munum við gamla fólkið :o) Þessi hross eru
sem sagt öll af Vesturlandinu og vetrarverkefnin okkar ásamt
öðrum hrossum.
09.01.2009
Í byrjun árs er gott að létta aðeins á "lagernum" - því höfum
við opnað smá Markað hér á síðunni.
Erum rétt að byrja að setja inn en væntanlega verður þarna
allslags varningur með tímanum.
03.01.2010
Það er vel við hæfi að byrja fréttaárið á henni Golu okkar.
Þarna er hún á nýársdag, aðeins að kíkja út í veðurblíðuna og
velta sér. Henni hefur farið mikið fram undanfarið og er
farin að hlaupa við fót :o) Það leit alls ekki út fyrir að
hún myndi líta þennan dag...eftir að hafa nánast dáið þrisvar en
með öllum tiltækum ráðum eigenda og dýralækna náðist hún þó
tilbaka. Það veitti okkur því mikla gleði í hjartanu að
sjá hana brokka léttilega út í snjóinn, taka þar á rás í
sköflunum og velta sér hraustlega. Gleðilegt nýtt líf (ár) frú
Gola!
02.01.2010
Við höfum fengið vel af snjó undanfarið og nú miklar
frosthörkur. Veðrið er í raun eins fallegt og hægt er að
hugsa sér en auðvitað er kuldinn strembinn fyrir útiveru manna
og dýra. Búið að moka mikið af snjó undanfarið, bæði með
höndum og eins allt að þremur vélum í einu, þar af einni
traktorsgröfu. Veitir ekki af enda af nógu að taka.
Strákunum hefur þó ekki leiðst snjórinn og tóku nokkrar
"fallegar" pósur fyrir myndavélina. Það er Auðunn Orri (10
ára) sem flaug þarna í hæstu hæðir á brettinu sínu og Ævar fékk
líka eitt flug fram af sleðanum sínum og fannst það bæði fyndið
og hetjulegt (enda bara 3 ára). Allir skemmtu sér
konunglega þó frostið biti kinn.
01.01.2010
Gleðilegt nýtt ár!
Smellið hér til að skoða
fréttir 2009 Smellið hér til að skoða
fréttir 2006-2008 Smellið hér til að skoða eldri
fréttir frá 2006
|
%20of%20imatolt.jpg)
