|
21.12.2011
05.12.2011
Þetta er hún Fornöld frá Fornhaga II, 5v. undan Þorsta frá Garði og
Hörku okkar. Fornöld er nú í eigu
Erlings Klemenzsonar en það var einmitt hann sem sendi okkur
þessa mynd. Fornöld er mikið geng og eru töltið og skeiðið
hennar aðall. Hún er nú í þjálfun og tamningu hjá Elvari
Þormarssyni og það er hann sem situr hryssuna á myndinni.
29.11.2011
Veturinn kom í gær með stæl, og í nótt og dag fengum við fyrsta
veðuráhlaupið. Búin að vera norðlensk vetrartíð með
tilheyrandi stormi, hríð og lokunum skóla. Um miðjan
daginn í dag fór að rofa til, hrossin farin að beita sér og allt
lítur þetta betur út. En það er líka bara notalegt inni á
dögum sem þessum. Spáð er á áframhaldandi vetri með miklu
frosti svo líklega er þessi snjór kominn til að vera í bili.
27.11.2011
Í gær var fyrsti dagur á gjöf fyrir útiganginn þennan veturinn.
Hvítur snjór liggur snyrtilega yfir öllu og farið að kólna til
muna. Folöldin á myndunum eru talin frá vinstri:
Kósi Tristansonur, Kjarvöl Hrímnisdóttir, Kolbeinn Gígjarsson og
Kamilla Álfsdóttir. Þessi folöld munu öll færast til nýrra
eigenda á næstu vikum og mánuðum, utan Kolbeinn sem ætlar
vonandi að gleðja ræktendur sína eitthvað lengur með nærveru
sinni. Einu fulltrúar Fornhagabúsins á járnum þessa dagana
eru þau Hreimur Gígjarssonur (3v.
stóðhestur) og Hildur
Gaumsdóttir (4v.) en þau eru komin undir hnakkinn hjá Birni
Einarssyni á Hvanneyri.
26.10.2010
Í dag flaug erlendis Álfssonurinn okkar hann Tári frá Hvanneyri
en hann hefur verið seldur til Þýskalands. Við erum mjög
ánægð með að fá undan honum 7 folöld næsta vor enda
bráðefnilegur stóðhestur þarna á ferðinni. Hamingjuóskir
til nýrra eigenda.
16.10.2011
Kamilla frá Fornhaga II - komin í
vetrarbúninginn.
Nýtt kynbótamat var reiknað á dögunum og í nýja matinu koma
Brynja og hennar afkvæmi vel út. Hæsta mat á okkar búi
hefur hún Kamilla, Brynju og Álfsdóttir en hún er með 123 stig.
Topp þrír:
Kamilla fædd 2011 - F. Álfur frá Selfossi M. Brynja frá Árbæ =
123 stig
Bastían fæddur 2010 - F. Kvistur frá Skagaströnd M. Brynja frá
Árbæ = 122 stig
Brynja sjálf, móðir Kamillu og Bastíans, F. Leiknir frá
Vakursstöðum M. Bringa frá Feti = 120 stig
Önnur hross ná ekki 120 stigum en Tári Álfssonur er rétt fyrir
neðan með 119 stig.
Skemmtilegar pælingar :o)
01.10.2011
Hrossastúss :o) Í gær, föstudag, tókum við okkur sumarfrísdag
þar sem starfsdagur var í skólum Auðuns og Ævars og nýttum
daginn til fulls! Rákum inn yngstu tryppin, greiddum flóka
úr þeim Írenu, Ísöld og Jöldu. Það er nefnilega ekki
alltaf tekið út með sældinni að vera vel hærður og því hafa þær
fengið að kynnast enda alltaf með einhverja flóka og lyng í sínu
annars mjög svo prúða hári. Snyrtum líka hófa á 2ja vetra
hryssunum og settum tryppin svo á túnið svona til að njóta
síðustu alvöru grænu stráanna fyrir veturinn.
Ævar eignaðist á dögunum hann Jarl sem er veturgamall.
Jarl er afar geðgóður og ljúfur foli og má segja að þeir séu
ánægðir hvor með annan. Í tryppastússinu naut Jarl þess að
láta Ævar knúsa sig enda fékk sá síðarnefndi sér koll og
plantaði framan við stíuna og sá um hinar ýmsu dekurmeðferðir í
þágu þess brúna.
Einn, tveir og allir í takt! Jalda (nær) og Júdit (fjær)
eru veturgamlar Þorradætur. Báðar mjög álitlegar hryssur
og mikill Þorrasnikkur á þeim :o) Jalda sérlega faxprúð og
þegar búið var að plokka lyng og strá úr faxinu og taglinu á
henni leit hún alveg ljómandi vel út. Jalda er undan Hörku
frá Akureyri (8,13) og Júdit er undan Söndru frá Hvassafelli
(7,81)
Tókum svo hringinn í kringum Tröllaskagann svona til að enda
góðan dag með stæl. Snæddum nesti í Héðinsfirði, sund á
Hofsósi og kvöldverður hjá Úlfunum í Skagafirðinum.
Frábært veður, þrátt fyrir slæma veðurspá, og dagurinn dásamlega
vel heppnaður.
14.09.2011
Slátrun lokið - kíkið á sauðféð.
10.09.2011
Göngur og réttir fóru fram í dag. Þvílík einmuna blíða :o)
Það smalaðist mjög vel, féð mikið komið niður og það fé sem enn
var uppi var ekki með teljandi vesen. Smalarnir þrír
(Anna, Katý og Líney) sem fóru fyrir okkar bú, höfðu því ekki
upplifað jafn auðveldar og skemmtilegar göngur og voru farnar í
dag. Í Þorvaldsdalsrétt var jafn margt fólk og fé en það
hlýtur að vera landsmet hversu margir bændur eru um þessar fáu
kindur sem koma á réttina. Kannski er Hörgárdalurinn mekka
smásauðfjárbænda, hver veit. En á móti kemur að göngur eru
vel mannaðar og mikið um aukafólk sem gerir verkið bæði
auðveldara og skemmtilegra. Fornhagabúið fékk allt sitt fé
heim í fyrstu göngum, hvern einasta haus...meira að segja
Finnbogi ullarhnoðri (hrúturinn okkar) hafði sig heim. Það
verður gaman að vigta karlinn en við erum mikið búin að
spegulera í því hvort hann komist inn í vogina sökum lengdar!
05.09.2011
Í morgun fæddist hér óvæntur glaðningur en hryssa sem hér er í
fóstri kastaði þessu fallega merfolaldi. Eigandinn
búsettur í Þýskalandi og fékk þarna tvo fyrir einn, en ekki var
vitað að hryssan væri fylfull fyrr en fyrir þremur vikum eða
svo. Merfolaldið hefur hlotið nafnið Kómeta frá Fornhaga
II en foreldrarnir eru Snædís frá Árholti 5v. og Eldar frá
Efra-Holti 3v. Eldar er undan HMfaranum Sigri frá Hólabaki
og hefur sú stutta náð þessu fallega dökkrauða lit úr
föðurleggnum. IS2011265889 Kómeta frá Fornhaga II
Melanie - congratulation with your new foal :o)
03.09.2011
Jónína kemur brosandi heim í Litlu-Brekku á nýja
Brún. Simmi sáttur með pylsu og Pepsi. Gísli og
félagar hjá Smáranum stóðu vaktina við grillið.
Axel og dætur í fallegum lopapeysum. Anna
og Auðunn að leggja á í Litlu-Brekku. Picasso og Sómi
stóðu sig vel að vanda.
Kaffireið Framfara fór fram í dag. Mjög gott veður,
góð stemning og allir sælir og glaðir eftir daginn.
Smárinn seldi ferðalöngum pylsur og gos, smáfólkið sá til þess
að hænurnar hans Garðars í Litlu-Brekku verpi eitthvað lítið
næstu dagana og hestamenn og konur á öllum aldri nutu samveru
við menn og hesta. Mjög skemmtileg leið farin en við riðum
um Möðruvallaengin sem er líklega eitt besta reiðfæri sem hægt
er að hugsa sér. Takk bændur á Björgum og Litlu-Brekku
fyrir aðstöðuna. Auðunn Orri skellti sér í fyrsta sinn í
kaffireið á honum Sóma sínum. Auðunn var virkilega
hamingjusamur með daginn og fannst þetta algjörlega toppa fyrri
reiðtúra. Í ferðalok (passlega) byrjaði að rigna og þá var
bara að skutla hestunum á kerru og bruna heim.
Skemmtilegur og velheppnaður dagur. Arnar og Ævar sáu um
að festa þetta á mynd en þeir voru meðal fulltrúa bílandi
félagsmanna í ferðinni.
24.08.2011
Kíkið á Hross til sölu og skoðið hana
Mánadísi frá Tyrfingsstöðum, 7v. rauðtvístjörnótta flotta hryssu
á mjög góðu verði. Hryssa sem á mikið inni.
21.08.2011
Hænur flytja í nýtt hús og hjólakassabíll verður til.
Kíkið á Fornhaga II.
04.08.2011
Þessi sætu merfolöld eru þær Fregn og Fornöld frá Fornhaga II.
Þær hafa nú verið "gefnar út" á púða en Elín Aradóttir sem á og
rekur fyrirtækið www.lagdur.is
hefur látið framleiða mjög falleg púðaver í þremur útgáfum en
þau prýða ljósmyndir úr íslenskri náttúru. Púðaverin eru
þvottekta og eru þrjár mismunandi myndir í boði. Hestar,
húsendur og hrúturinn Lagður. Kíkið endilega á heimasíðuna
hennar og skoðið þessa fallegu vöru.
For sale at www.lagdur.is -
decorative cushioncases with photos from icelandic nature.
03.08.2011
Þessi hestur hefur ekki ratað á síðuna okkar fyrr en nú.
Þetta er hann Efi frá Fornhaga II.
Hann er 6v. jarpur með lítinn leist á afturfæti. Þennan
hest fékk Ævar Ottó í staðinn fyrir hann Mugg sem flutti til
himna í vor eftir slys. Bústinn og sællegur Efi :o)
en það hefur einmitt háð honum mikið hingað til að á honum vildu
ekki festast nein hold. Svo þetta er allt að gera sig
núna.
20.07.2011
Stóðhestur Fornhagabúsins þetta sumarið er
Tári frá Hvanneyri. Tári er tveggja vetra undan Álfi
frá Selfossi (8,46) og Tíbrá frá Hvanneyri (8,10). Tári er
í merum hjá okkur hér niður á árbakkanum og þarna skoppaði hann
um hólfið í dag þegar við heimsóttum hann. Afskaplega
léttbyggður, geðgóður og skemmtilegur hestur. Tári er mjög
stór og ekki spillir prúðleikinn. Fló
okkar var sónuð geld við Blæ frá Torfunesi og skelltum við henni
beint undir Tára þannig að nú erum við sjálf með 6 hryssur hjá
honum og nokkrar aðrar fá að njóta hans einnig. Það ætlar
sem sagt ekki að ganga vel hjá okkur að fá folald undan Blæ en
við höfum gert tvær tilraunir til að fá folald undan honum :o/
en ekkert gengið.
19.07.2011
Þetta er hún Berglind frá Eiðisvatni,
veturgömul. Hún er dóttir Dyns frá Hvammi (8,47) og Lindar
frá Erpsstöðum (8,06). Gríðarlega stór og myndarleg
hryssa, faxprúð, traust og vel geng. Berglindi eigum við í
sameign með þeim Vigni og Jónínu í
Litlu-Brekku en þau
létu okkur þessar myndir í té.
11.07.2011
Jæja...loksins gáfum við okkur tíma til að setja inn nýjar
myndir af henni Kamillu, Brynju og
Álfsdóttur. Annríki undanfarinna daga kom meira að segja í
veg fyrir að hún fengi myndatöku til samræmis við önnur folöld á
bænum og bætum við það upp hér með. Hún er snaggarlega sú
stutta, algjör lottóvinningur eigendanna enda miklu kostað til.
Brynja passar vel uppá hana og ljósmyndarinn átti fullt í fangi
með að komast í tæri við þá litlu. Á fyrstu myndinni má
sjá Brynju hreinlega reka Kamillu á stað :o)
IS2011265-888 Kamilla frá Fornhaga II
09.07.2011
Í dag fóru fram árlegir Bjargaleikar Framfara á Björgum.
Ævar keppti í pollaflokki á Sóma hans Auðuns og hlutu þeir
fimmta sætið. Arnar fékk að taka á því í brautinni með því
að teyma undir, og Ævar hélt pabba sínum duglega við efnið með
því að segja honum að fara hraðar og hraðar og helst á stökk!
Sómi stóð sig eins og hetja, var járnaður daginn fyrir leikana
og klikkaði ekki frekar en fyrri daginn...þrátt fyrir að vera
150 kg. of þungur! Frábær hestur hann Sómi en svona í
hærri kantinum fyrir litla knapa en hann er 153 cm. á band!
Myndirnar hér að ofan eru teknar af Auðuni Orra utan myndina þar
sem Ævar heldur verðlaununum hátt á loft. Það var Jónína
Garðarsdóttir í
Litlu-Brekku sem tók hana sem og myndirnar af Arnari hér að
neðan. Takk fyrir það.
Arnar keppti í bændaflokki á honum Saxa frá Sauðanesi en hann er
6v. gamall sonur Smára frá Skagaströnd. Hlutu þeir félagar 3.
sætið. Ragnar Stefánsson skaut þessum fína reiðskjóta
undir karlinn en Raggi kom og hirti gullið í skeiðinu á honum
Maur frá Fornhaga II, en því miður eigum við ekki myndir af þeim
frá mótinu. Maur er gríðarmikill vekringur undan
Fló og Rökkva frá Hárlaugsstöðum.
05.07.2011
Það var sem sólin skini (þó að nánast sjáist varla hvað er á
þessum dimmu myndum) þegar Brynja kastaði brúnni hryssu við Álfi
frá Selfossi í nótt. Það var mikill spenningur að fá þetta
folald og auðvitað var stóra óskin að fá hryssu og hér er hún
fædd, Kamilla frá Fornhaga II. Kynbótamat
foreldranna er mjög hátt fyrir tölt, vilja og geðslag og fegurð
í reið þannig að ætli þarna sé ekki flott, viljug, tölthryssa
fædd :o) enda skyldleikaræktuð út af Orra höfðingjanum
þessi.
IS2011265888 Kamilla frá Fornhaga II
F. Álfur frá Selfossi 8,46
FF. Orri frá Þúfu 8,34
FM. Álfadís frá Selfossi 8,31
M. Brynja frá Árbæ 8,14
MF. Leiknir frá Vakursstöðum 8,28
MM. Bringa frá Feti 8,66
MMF. Orri frá Þúfu 8,34
Og þá eru öll folöld fædd á bænum þetta sumarið.
Hlutfallið 5 hestar og 4 hryssur. Litaflóran með daprara
móti en fengum heilbrigð og falleg folöld, sem öll lifa og það
er fyrir mestu. Folöldin þetta árið eru eins og áður hefur
komið fram undan Álfi frá Selfossi, Ljóna frá Ketilsstöðum,
Gígjari frá Auðsholtshjáleigu, Hrímni frá Ósi, Tristani frá
Árgerði og Hreimi frá Fornhaga II.
25.06.2011
Tókum veturgömlu og tveggja vetra tryppin og klipptum hófa,
gáfum ormalyf og greiddum flóka úr faxi á þeim Ísöld og Írenu.
Settum þau svo í fjallhólfið. Á myndinni má sjá ofan á faxið á
henni Ísöld. Hún er tveggja vetra undan Fló og Tenór frá
Túnsbergi. Mikið og fallegt silfurgrátt fax á dökkgráum
kroppnum.
24.06.2011
Loksins uppfærðum við sölusíðuna hjá okkur. Kíkið á
hross til sölu.
Horses for sale.
23.06.2011
Laust eftir miðnætti kastaði Svala þessum dökkrauðblesótta,
hringeygða hesti við Hreimi
Gígjarssyni. Það var verulega svalt á þeim mæðginum og
gamla nötraði og skalf af kulda fyrst eftir köstunina. Svo
hresstist hún fljótt og reif í sig brand og fór að sinna
folaldinu. Ævar skírði svo karlinn í morgunsárið,
Karíus frá Fornhaga II. Karíus er með breiðan og
mikinn hring í hægra auga og grannan hring í vinstra auga.
Stórt og flott folald - IS2011165883 Karíus frá Fornhaga II.
22.06.2011
Í kvöld settum við Tára frá Hvanneyri í
nokkrar hryssur hér í Fornhaga. Við höldum sjálf 5 hryssum
undir hann en það eru þær: Gola, Sandra, Svala, Hespa og
Hending. Þarna má sjá hann skoða hryssurnar sem eru af
öllum mögulegum litum.
Áður en Tára var sleppt í hryssurnar fékk hann smá skólun inni
við og tók því mjög vel. Afar þægur og meðfærilegur.
Þarna er Arnar að dunda með hann á stéttinni.
Í kvöld fór líka Ósk undir stóðhest en hún fór undir Segul frá
Akureyri, þriggja vetra fola sem er undan stólpa gæðingnum
Væntingu frá Brúnastöðum (8,44) og undan Piltssyninum Sikli frá
Sperðli (8,34). Myndir frá því bíða betri tíma.
19.06.2011
 
Dagurinn í dag var virkilega góður dagur á margan hátt.
Söludagurinn okkar hér í Fornhaga, þar sem boðin voru til sölu
hross úr dánarbúi Óla G, gekk frábærlega. Fullt af
fólki leit við og rúmlega 20 hross eignuðust nýja eigendur!
Hrossin voru á öllum stigum, fjölbreyttir litir og vonandi að
allir hafi fengið eitthvað við sitt hæfi. Veðrið frábært,
allt gekk upp og það var virkilega gaman að taka þátt í þessu
sérstaka verkefni. Allir sælir í dagslok yfir vel unnu
verki :o)
Og faxið flaksast...
Hreimur og Tári
eru prúðir á hár, enda nauðsynlegt fyrir stóðhesta að vera vel
hærðir. Tári (rauðskjóttur 2v.) kom til okkar í fyrradag
en hann verður í hryssum hér í Fornhaga II í sumar. Tári
er mjög stór og er algjör gelgja :o) Hann er mjög flinkur
og mjúkur og allur gangur til staðar. Skemmtilegur hestur
hann Tári.
17.06.2011
Álfadís og Ólga
fóru í dag vestur í Lunda II
til Sigbjörns og Rögnu. Þar munu þær verða settar undir
Alexander frá Lundum II á sunnudaginn. Alexander er
tveggja vetra, undan gæðingamóðurinni Auðnu frá Höfða og svo
aftur undan Kvisti frá Skagaströnd. Hann er brúnblesóttur,
leistóttur með vagl í auga. Á bak við Ólgu og Álfadísi eru
einmitt blesur og leistar og vonandi verða þær gjöfular á það
við þessum hesti. Þær eiga annað sameiginlegt en það er að
þær eru báðar Hornfirðingar í aðra röndina og það finnst okkur
pínu gaman að hafa með. Gaman að koma í Lunda í dag og fá
að sjá efnilega ungfola sem þar voru inni, meðal annars
áðurnefndan Alexander.
16.06.2011
Í morgun fór Fló undir Blæ frá Torfunesi.
Hugmyndin er að reyna að ná í hana fangi á folaldabeiðslinu en í
dag eru 6 dagar frá því hún kastaði. Undan Blæ komu mörg
mjög góð hross til dóms í vor og má segja að honum hafi skotið
eldsnöggt upp á vinsældarlistann og trjóni þar stoltur.
Svona til gamans þá eru 100% líkur á brúnu afkvæmi undan Fló og
Blæ. Þannig að það afkvæmi mun ekki sprengja litaskalann á
bænum....!
14.06.2011
Sleppt á fjall - sjá sauðféð.
13.06.2011
Bræður, Auðunn Orri og Ævar Ottó kjassa þarna Ósk og Kósa.
Ævar tók sig til í blíðunni á laugardaginn og fór að "temja
folöld". Fyrst hitti hann Kósa (jarpskjóttur) sem er mjög
gæfur og vill endilega láta klóra sér ögn í hvert sinn sem
einhver sýnir honum athygli. Þá hitti hann Kjarvöl (rauð)
sem er líka gæf og skemmtileg og óskaplega forvitin sæt skvísa.
Á síðustu myndinni er hann að eiga samskipti við Kór (brúnn).
Ævar á hann sjálfur og var mjög svekktur með sinn hest, þar sem
Kór leyfði Ævari aldrei að snerta sig. Það jákvæða var þó
að Kór kom og kíkti aðeins á Ævar í stað þess að hlaupa í felur
eins og hann er vanur. Svona eru þau nú misjöfn þessi
blessuðu folöld. En líka gaman að sjá einmitt mismunandi
karaktera í þeim á þessum tíma. Kór er orðinn
spikfeitur bolti enda mánaðargamall.
11.06.2011
Í morgun kastaði Ólga brúnni hryssu undan
Hreimi Gígjarssyni. Hún hlaut nafnið
Krá frá Fornhaga II. Krá er stórt og öflugt folald
og gangmikil eins og öll folöldin okkar þetta árið. Þá
eigum við bara eftir að fá eitt Hreimsbarn, undan henni Svölu
frá Hurðarbaki. Það ætti að fæðast í júlí. Í júlí
kastar líka hún Brynja frá Árbæ en hún er fylfull við Álfi frá
Selfossi. Sem sagt tvö folöld ófædd.
IS2011265887 Krá frá Fornhaga II.
Ein hryssa í okkar eigu fór í dóm í vikunni. Það var
fjögurravetra hryssa, Hildur frá Árholti, Gaumsdóttir.
Hildur hlaut 7,83 fyrir sköpulag, 7,38 fyrir hæfileika og 7,56 í
aðaleinkunn. Ágætis start hjá henni en við svona bjuggumst
við að fá betri byggingardóm á hana. Það verður vonandi
hægt að sækja það að ári sem og að bæta í hæfileikana en þessi
hryssa er mjög viljug og ör og því ekki alveg í hendi. En
góð byrjun og kominn tími á pásu hjá henni. Hlynur
Guðmundsson sýndi Hildi í fordómnum en Björn Einarsson í
yfirlitinu í dag.
10.06.2011
..og loksins gekk rófan! Seinnipart nætur kastaði
Fló þessum stórstjörnótta hesti við
Gígjari frá Auðsholtshjáleigu. Hún hafði vit á því að
hanga fram yfir versta veðrið, sem gekk yfir í gærkvöldi og
nótt, og þegar veðrinu slotaði kastaði hún. Folaldið hefur
hlotið nafnið Kolbeinn frá Fornhaga II, myndarhestur með
þessa svakalega flottu stjörnu. Vissulega dauðlangaði
okkur í hryssu undan Gígjari en það verður að bíða betri tíma.
IS2011165880 Kolbeinn frá Fornhaga II.
Í gærkvöldi skall hér á kalsa slydduhríð og algjört óyndi fyrir
skepnurnar að standa úti í suddanum. Við rákum lambféð á
hús en það hafði hrakist ofan í skurð og var orðið frekar
lúpulegt þegar við settum það inn. Eins hýstum við
veturgömlu tryppin okkar sem voru heilrökuð í vetur og áttu því
erfiðara með að standa af sér bleytuna og kuldann. Fjallið
okkar grátt niður fyrir miðjar hlíðar, eins og á köldum
haustdegi og einhvern veginn dettur manni varla í hug að það sé
kominn hefðbundinn sumarfrístími hjá fólki. Þvílík
kuldatíð.
Hún er algjört sjarmatröll hún Kjarvöl, undan gæðingnum Hrímni
frá Ósi og henni Álfadísi okkar en í
henni mætast þeir Adam frá Meðalfelli og Otur frá Sauðárkróki úr
báðum ættleggjum. Hún er undan Orradóttur, svo eru þeir
þarna í ættartrénu hennar þeir Gustur frá Hóli og Rökkvi frá
Hárlaugsstöðum. Þessi rauða skotta er með eindæmum
lífsglöð og skemmtilegt folald og nýtur þess til fulls að vera
til. Hún er með svaka flott ganglag og ósköp skemmtileg á
allan hátt. Álfadís stendur á tvítugu svo að nú gæti farið
að fækka þeim afkvæmum sem okkur hlotnast undan henni.
09.06.2011
Beðið eftir folaldi. Þarna gefur að líta júgrað á henni
Fló. Um hádegi í dag var farið að
buna mjólk úr henni, kl. 18 var hún enn bara að spreða broddinum
á fósturjörðina...og ekkert folald komið. Fæturnir allir
útataðir í broddi og júgrað við það að springa. Veðrið er
vægast sagt ömurlegt og ekki tilvalinn dagur til að kasta.
En heimilisfólkið er allt á vaktinni og stór hálmstía bíður
hennar inni ef þurfa þykir. Það er lítill Gígjarsormur sem
fæðist þarna :o)
07.06.2011
Í frostinu í nótt kastaði Harka gullfallegum rauðjörpum hesti
undan Ljóna frá Ketilsstöðum. Hann hefur hlotið nafnið Kvaran
frá Fornhaga II. Arnar og Auðunn Orri drifu sig út í
ískalda nóttina til að passa að sá stutti kæmist örugglega á
fætur. Með hjálp viðstaddra og fyrstu sólargeislum dagsins
komst hann á lappir og var hinn sperrtasti í morgun þegar vitjað
var um þau mæðgin. IS2011165881 Kvaran frá Fornhaga II.
Þessar skemmtilegu myndir hér að neðan sendi Inga María okkur
frá Feti í dag. Þau Toni duttu heldur betur í lukkupottinn
í gærmorgun þegar Auður frá Hofi (8,41) kastaði rauðstjörnóttri
hryssu undan Orra frá Þúfu (8,34). Í morgun hélt svo
lukkan áfram að vera þeim í vil þegar Spör þeirra frá
Ytra-Skörðugili (8,05) kastaði rauðri tvístjörnóttri hryssu
undan Kiljan frá Steinnesi (8,71).
Hér er Auður með Orradótturina sína.
Hún lét svo hafa meira fyrir sér sú stutta undan Kiljani og Spör
en þegar Inga og Toni komu heim í dag, frá því að smella
sitthvorri hryssunni í kynbótadóm og inn á Landsmót, fannst
folaldið í skurði og hafði damlað þar einhverja stund í
drullunni. Þá er bara að skella sér útí...og fórna sér!
Flott Inga!
05.06.2011
Snemma í morgun kastaði Álfadís rauðri
hryssu við Hrímni frá Ósi. Kjarvöl frá Fornhaga II
skal hún heita og við höldum að hún verði ekki grá, allavegana
er ekki að sjá neitt í þá veruna. Þá höfum við fengið bæði
Hrímnisbörnin og bæði hryssur. Gaman, gaman.
IS2011265885 Kjarvöl frá Fornhaga II.
Þar sem við vorum að skoða nýja folaldið hennar Álfadísar komu
þau Krít og Kósi og kíktu á okkur.
Þarna eru þau sperrt og fín þau Krít (brún/grá) og Kósi
jarpskjóttur. Kósi er afar vel gerður, eiginlega bara
alveg teiknaður og óskaplega skemmtilegur í artinu. Öll
folöldin sem við höfum fengið þetta vorið eru svakalega geng og
vorum við að hlægja að því að það hefur enn ekki sést eitt
einasta brokkspor í þeim! Bara fljúga um á tölti og skeiði
:o) Dásamlegt.
Svo er hér hann Kór Golusonur. Hann er mikill mömmustrákur
og gefur aldrei færi á sér til myndatöku. Svo að þá birtum
við bara mynd af honum með rassinn upp í loft frekar en engar,
og eina tekna í fjarlægð í morgun en þá spratt hann á stað um
leið og hann sá okkur og hvarf með það sama.
Vonandi nást betri myndir síðar :o)
29.05.2011
Kynbótasýningar eru nú á fullu spani. Ragnar bóndi á
Efri-Mýrum mætti með Maur frá Fornhaga II í kynbótadóm á Dalvík
í dag og sótti 9,0 fyrir skeið en þessi hestur er gríðar
stórstígur og mikill skeiðgammur. Maur datt með þessu yfir
áttuna og stendur nú í 8,01 í aðaleinkunn. Það er fínn
bónus fyrir eiganda hans, Malin Larsson og skemmtileg rós í
hnappagat knapans að sækja eina níu. Maur er undan
Fló og Rökkva frá Hárlaugsstöðum.
29.05.2011
Í morgun fæddist okkur jarpskjótt hestfolald Kósi frá
Fornhaga II undan Ósk og Tristan frá
Árgerði. Kósi er mikið hvítur, líkt og mamma sín, meira þó á
annarri hliðinni. Ósk er með eindæmum róleg og þrátt fyrir
að vera að kasta í fyrsta sinn gat Arnar lagst hjá henni og
strokið henni á snoppunni þar sem hún og Kósi lágu og hvíldu
sig. IS2011165889 Kósi frá Fornhaga II
27.05.2011
Þeir takast hraustlega á bræðurnir Hreimur (3v.) og Ívar (2v.).
Hreimur er eldri og nýtur þess að pína litla bróður, en Ívar
bíður rólegur eftir að Hreimur tapi úthaldinu og þá snýst dæmið
við. Það er óhætt að segja að þarna fái bæði vöðvar og
hitaeiningar að finna fyrir því. Þeir eru því báðir
orðnir mjög stæltir og eru að springa úr orku.
26.05.2011
Í nótt kastaði Sandra grárri hryssu
(fædd brúnstjörnótt) undan Hrímni frá Ósi. Sú stutta
fæddist í frosti og voru þær mæðgur hálf stirðar í kaldri
vornóttinni. Sólin kom svo á fætur um hálftíma síðar og þá
var nú öllu hlýrra að vera til. Í kvöld fórum við svo
aftur á stjá með myndavélina og á myndunum má glögglega sjá gráa
augnumgjörðina og gráar granir. Folaldið hefur hlotið
nafnið Krít frá Fornhaga II enda líklega ekki mörg ár í
að hún verði mjög ljós eða hvít. IS2011265886 Krít frá
Fornhaga II.
Þarna eru þær mæðgur að stauta í frostinu í nótt.
25.05.2011
Hún Ósk frá Ytri-Bakka er eins og sjá má
rauðskjótt á lit. Hún er líka blesótt og svo er hún með
stóran blett á vinstri hlið. En almættinu hefur eitthvað
fatast flugið þegar lita átti á henni hausinn og sennilega hefur
rauði liturinn klárast. Skemmtilega skræpótt neðan á
hausnum þessi hryssa. Ósk kastar við Tristan frá Árgerði
nú í sumar.
24.05.2011
Eftir grimma veðurnótt með miklu roki og slyddu, liggja
hryssunar og hvíla sig. Arnar var á vaktinni fram á nótt
að setja inn hross og færa á milli hólfa til að reyna að láta
þeim líða sem best á meðan á þessu stóð. Dagurinn í dag byrjar
mjög vel, hálf sól og milt í veðri. Það kunna hrossin vel
að meta og nú vonumst við til að þessu blessaða hreti sé lokið.
Aðeins þó kvíðin yfir veðurspá næstu daga því í staðinn gætum
við fengið ösku á fimmtudag og föstudag. Þetta eru vægast
sagt skrítnir dagar veðurfarslega.
14.05.2011
Í kvöld fæddist fyrsta folaldið þetta vorið hjá okkur.
Gola Gustsdóttir kastaði brúnu
hestfolaldi við Hreimi Gígjarssyni.
Folaldið hefur hlotið nafnið Kór frá Fornhaga II og er í
eigu Ævars Ottós en honum hafði verið lofað þessu folaldi ef það
yrði hestur. Allir hamingjusamir yfir því að fá lifandi
folald úr Golu, hið fyrsta eftir að hún "gekk aftur" og Ævar enn
glaðari þar sem hann fékk það sem hann pantaði. Kór
fæddist á Eurovisiondaginn en í fyrra fæddist okkur líka folald
á Eurovisionkvöldinu svo að þau Kór og Jalda (sem fæddist á því
kvöldinu fyrir um ári) hljóta að vera ákaflega músíkalskt par!
IS2011165882 Kór frá Fornhaga II.
03.05.2011
Gengur vel í sauðburðinum. Kíkið á
sauðina og sjáið þar Lafði Lokkalöng sem fæddist í dag.
28.04.2011
Þeir eru búralegir félagarnir Arnar og Vignir en í kvöld kom
Vignir og tók DNA úr folöldunum hjá okkur. Á myndinni
handleika þeir sameignina Berglindi frá Eiðisvatni.
27.04.2011
Lambakóngur fæddist í dag. Það var Pálína gemsan hans
Ævars sem bar svörtum hrút, stórum og eldsprækum. Faðirinn
er Salomon svarti frá Syðri-Bægisá, en þó í raun vestan af
Snæfellsnesi. Pálína sver sig mjög í stóru Strandakollurnar og
er mikil móðir og flóðmjólkar.
25.04.2011
Þessi skuggavera er hún Júdit frá Fornhaga '10. Hún var
tekin undan í dag og í sömu andránni rökuðum við af henni
feldinn sem var mjög þykkur og fitugur. Hún kunni vel að
meta raksturinn enda komið vor í loft og inniveran krefst
lágmarks hlífðarbúnaðar. Júdit er undan Þorra frá Þúfu og
Söndru frá Hvassafelli. Hún er
hágeng, faxprúð og algjör snillingur :o) Setjum inn
"raun"mynd af henni við tækifæri.
24.04.2011
Gleðilega páska!
18.04.2011
Hann Auðunn stækkar og stækkar...en hjólið hans því miður ekki
með honum... Þess vegna er kominn tími á skipti og nú er
krossarinn hans til sölu. Sjá
nánar hér. Frábært hjól fyrir svona 9-12 ára aldur.
10.04.2011
Það er ekki alltaf tekið út með sældinni að vera í hrossarækt,
því fékk Ævar (5 ára) að kynnast um helgina. Þarna er hann
með honum Muggi sínum (4v). Þeirra samleið endaði á
laugardaginn þegar Muggur slasaði sig til ólífis og var felldur.
Ævar fékk Mugg folaldið og því höfðum þeir þekkst nokkuð lengi
karlarnir. Muggur var risastór og skrefmikill. Það
fór minna fyrir ytri fegurð hans en skeytti sig með mjórri blesu
og leisti á afturfæti. Muggur sem var frá Tyrfingsstöðum
var undan Maur frá Fornhaga II og Uglu frá Frostastöðum sem var
aftur undan Lofti frá Vatnsleysu.
07.04.2011
   
Hann er skrokkléttur og hreyfingafallegur hann
Jarl frá Fornhaga II en hann er fæddur
2010 undan Álfadísi frá Ásmundarstöðum
(Orradóttur) og Maur frá Fornhaga II (Rökkvasyni). Þessi
foli er ótrúlega léttur á sér, flottur fótaburður og mikið svif
á gangi. Brokkar mikið og flott, töltið laflaust og fetið
er alveg úrval. Sýnir strax mikið rými, er gæfur og
traustur, ákaflega lífsglaður og léttur í lund. Það er
greinilega alveg að virka að skyldleikarækta útaf Otri gamla!
03.04.2011
Þarna er Arnar að fortemja hann Hreim okkar.
Hreimur er stóðhestur á þriðja vetri
undan Gígjari og Hörku. Spennandi foli
sem við notuðum í hryssur hjá okkur síðasta sumar. Hreimur
er brúnn (mjög dökkur) en á myndunum hér að ofan er hann rakaður
og því svona ljós á skrokkinn. Á stóðhestaveislunni á
Sauðárkróki um helgina sáum við Gígjarssoninn Fláka frá
Blesastöðum en hann heillaði okkur algjörlega upp úr skónum og
styrkti trú okkar á Gígjari enn frekar. Frábær gæðingur
Fláki og verst að myndavélin var ekki með í för til að hafa hann
á mynd. En til að viðhalda Gígjarsblóðinu hjá okkur þá
fáum við folald í vor undan Gígjari og Fló,
systur Hörku og svo auðvitað Hreimsbörnin sem ættu að vera þrjú
talsins.
28.03.2011
Helgina notuðum við einnig til að hitta hana Hildi frá Árholti,
sem við eigum í tamningu hjá Bjössa Einars á Hvanneyri.
Bjössi á orðið helmingshlut í hryssunni en Hildur er á fjórða
vetri, undan Gaumi frá Auðsholtshjáleigu og er efnis hryssa með
allan gang. Hún er nú ekki mikið tamin ennþá en lofar
góðu, skrefar vel með flott svif á brokki og svo er skeiðið
galopið líka. Tölti mest í upphafi og týndi því aftur...en
það er allt að koma til baka. Vel viljug með góða byggingu
og er stefnt með þessa hryssu í dóm í vor.
27.03.2011
Fórum um helgina í 25ára afmæli til Orra frá Þúfu! Aldrei
hefur maður áður lent í afmælisveilsu hjá hrossi og hvað þá með
mörg hundruð öðrum :o) Stórgóð sýning með 100 hrossum,
undan eða útaf Orra. Orri sjálfur mætti á svæðið og
hegðaði sér "eins og heima hjá sér" enda gapti hann og geispaði
á meðan gestir sýningarinnar risu úr sætum og hrópuðu ferfalt
húrra honum til heiðurs. Á mynd tvö er Inga María,
húsfreyja á Feti, á stóðhestinum Þorbirni frá Feti,
Vilmundarsyni, Orrasyni. Þá er Erlingur Erlings á Álfi frá
Selfossi. Frábær sýning með einu besta fyrirkomulagi sem
maður hefur upplifað í svona innanhússhestasýningarhaldi....(vá
hvað þetta var langt orð!).
23.03.2011
Þessi risastóra rauða hryssa heitir Berglind frá
Eiðisvatni. Berglind er fædd 2010, undan Dyn frá Hvammi
(8,47) og Lind frá Erpsstöðum (8,06). Berglindi ræktuðum
við í sameiningu með þeim
Vigni og Jónínu í Litlu-Brekku og eigum við helming í henni
á móti þeim. Berglind er afskaplega traust hryssa með
galopið ganglag. Hún er MJÖG stór og yfirveguð. Hér
er hún við komuna í Fornhaga um daginn og eftir stutt kynni
smelltum við henni út í stóðið. Hún verður svo tekin á hús
síðar í vetur með merfolöldunum sem enn eru úti, utan eitt.
21.03.2011
Það má alltaf finna eitthvað gott í öllu. Þarna æfa
merfolöldin fótaburðinn í snjónum :o) Færið músina yfir
myndirnar til að sjá hvaða hross eru hér á ferðinni.
12.03.2011
Það stytti upp! og þá var þessi líka dásamlega fallega
fjallasýn. Guðmundur og Anna í Gufudal, komu til okkar um
helgina og færðu okkur hana Berglindi frá Eiðisvatni.
Berglind slapp við myndatökur og á það bara inni :o) en í
staðinn fluttu að heiman þær Von, Sunna og Jara. Von og
Sunna eru þarna í sniðugri pósu rétt áður en þær lögðu af stað
vestur.
10.03.2011
Staðið í höm. Veðrið hefur sýnt öll sín helstu tilbrigði
undanfarið. Nú snjóar og blæs, fimbulkuldi og frostið læsir sér
í allt sem fyrir er. Hrossin taka þessu sem hverju öðru
hundsbiti og bíða af sér veðrið í von um betri tíð. Spáin er
ekki góð framundan, áframhaldandi suðvestanátt og snjókoma.
Það er síður en svo góð blanda í Fornhaga II.
05.03.2011
Við erum alltaf að bæta inniaðstöðuna hjá okkur og nú er hún að
verða nokkuð endanleg í bili. Við erum með gott svæði til
frumtamninga eða 5,40x20, alls 108 m². Á langhliðum eru
hallandi battar og nú er búið að bæta í vegghæðina. Einnig
eru komnar stórar hurðir í báða enda. Nú á bara eftir að
skoða með gólfefni en sandur og möl er í gólfinu.
Gæti verið gaman að ná í eitthvert pínu bindiefni saman við.
Skoðum það síðar. Marsmánuður verður byrjunarmánuður
hjá okkur í tamningum og útreiðum enda lítið að gera með hross á
húsi þegar maður fer að heiman í myrkri að morgni og kemur heim
í myrkri að kveldi.
En hryssan sem hér er á myndum er Von frá Syðsta-Ósi, 5v. Hún
kom ný til okkar í dag og til að kanna málið var hoppað beint á
bak. Hún er í miðju frumtamningaferlinu og kann svo sem
ekki mikið en þæg og traust og efni í þægilegt fjölskylduhross.
Í dag komu einnig til okkar 5 önnur ný hross. Tvær hryssur
á fimmtavetri og þrjú folöld. Tvö af þeim eru þegar seld
en hin þrjú sem eru til sölu hjá okkur og hér eru myndir af
tveimur þeirra. Sjá meiri upplýsingar um þau undir
hross til sölu.
Katla frá Árholti, fædd 2010, bleikálótt hryssa, falleg með
léttar og flottar hreyfingar.
Jódís frá Árholti, fædd 2010, fífilbleikskjótt hryssa með vagl í
auga. Snotur með fínan fótaburð.
28.02.2011
IS2010165002 Bastían frá Litlu-Brekku
Kynbótamat 122
F. Kvistur frá Skagaströnd 8,58
FF. Hróður frá Refsstöðum 8,39
FM. Sunna frá Akranesi 8,16
M. Brynja frá Árbæ 8,14
MF. Leiknir frá Vakurstöðum 8,28
MM. Bringa frá Feti 8,66
Þessi spilandi létti foli er nýkominn á hús hjá okkur í Fornhaga
en eigendur hans eru með okkur þau Vignir og Jónína í
Litlu-Brekku.
Hann er brúnn, leistóttur á 2 fótum í aðra áttina en á 3 fótum í
hina áttina :o) Það er nefnilega einn hófur hvítur til
hálfs og sést því ekki nema úr annarri áttinni (ef svo má
segja). Hann fæddist með alla hófa hvíta en einn hófurinn
óx svo dökkur niður. Frábær ganghestur með mikinn fótaburð.
27.02.2011
Þarna er búið að svipta Janus hárinu. Janus IS2010165880
er undan Þorra frá Þúfu og Fló frá
Akureyri.
Hann er gríðarlega stór og léttbyggður, þægur og traustur og var
smá vandamál að taka myndir af honum hreyfa sig, því hann hljóp
alltaf beint á ljósmyndarann í von um klapp og knús.
Tignarlegur foli með allan gang og góðan fótaburð.
Fleiri strippalingar! Þessi feita og faxprúða bolla er
Jalda IS2010265881 undan Þorra frá Þúfu og
Hörku frá Akureyri. Hún fæddist með krullur og svona
helmingi meira hár en önnur folöld. Svo er hún líka með
helmingi meiri fitu en önnur folöld! :o) Jalda er ganggóð
með flottan fótaburð og allan gang. Afskaplega rólynd og
traust.
Jarl IS2010165885 er undan Álfadísi
frá Ásmundarstöðum og Maur frá Fornhaga II. Algjör
sprelligosi og getur hlaupið alveg út í eitt. Hann er stór
og mjög skrefamikil með galopið ganglag. Alveg keppnis
þessi! Þegar hann loksins hætti að stökkva...nennti hann ekki
meir og hætti að sýna sig fyrir ljósmyndaranum. Hér fyrir
neðan má sjá í hvað hann eyddi orkunni á myndadaginn!
Gaman að segja frá því að systir hans, Írena,
var líka svona hlaupaglöð folaldið og ótrúlegt að sjá hvað
sum hross geta verið lífsglöð á meðan önnur rétt nenna að draga
andann og borða :o)
22.02.2011
Unnið í lífeyrinum! Þarna er Vignir í Litlu-Brekku að raka
Bastían Kvistsson en í kvöld rökuðum við tvö af þeim folöldum
sem eru komin inn og mætti Vignir fyrir hönd
Bastíansmeðeigandanna. Í góðlegu gríni tölum við oftast um
að Bastían sé lífeyrissjóðurinn okkar og þau afkvæmi Brynju sem
á eftir honum koma. Á seinni myndinni kljást þau Jalda
Þorradóttir og Bastían. Frískandi að vera laus við
loðfeldinn mikla.
21.02.2011
Betra seint en ekki! Þarna er hún Ósk frá Ytri-Bakka, 7v.
rauðskjótt, en hana keyptum við á síðasta degi síðast árs. Ósk
er stór, þæg og hágeng en hún er fylfull við Tristan frá Árgerði.
Hún er undan Val frá Höskuldsstöðum og Ösp frá Naustum við
Akureyri. Myndina fengum við lánaða hjá bændum í
Litla-Garði en það er
Stefán Birgir sjálfur sem þarna situr Ósk.
20.02.2011
Í dag var loksins komið að því að byrja að taka undan
folaldsmerunum. Tókum inn fjögur folöld, öll brún, enda
settum við met í að fá brún folöld á síðasta ári :o) En
þótt liturinn sé dökkur er bjart yfir þeim. Óvenju flottur
og gangmikill hópur og öll hágeng. Það var magnað gaman að
láta þau sprikla aðeins fyrir myndavélina svona í byrjun
fortamningarinnar. Fyrir liggur að heilraka þau og kenna
þeim ýmislegt gagnlegt fyrir komandi ár. Á næstunni tökum
við svo inn þrjú folöld til viðbótar en þetta er góð byrjun.
Að ofan: t.v. Jarl undan Álfadísi og Maur. t.h. Bastían frá
Litlu-Brekku undan Brynju og Kvisti.
Að neðan: t.v. Janus undan Fló og Þorra. t.h. Jalda undan Hörku
og Þorra.
16.01.2011
Þeir tóku á því bræður tveir í snjónum í dag enda veðrið
dásamlega gott og fyrsti sunnudagurinn bara nokkuð lengi sem er
veðurblíða. Þetta eru þeir Hreimur
og Ívar, tvö af stóðhestsefnunum okkar,
en í dag fengu þeir rakstur undan faxi og heilmikið pússerí.
Ívar var svo tekinn í áframhaldandi fortamingu. Hann er á
annan vetur en Hreimur verður þriggja vetra í vor. Á fyrri
tveimur myndunum má sjá Hreim en Ívar montar sig á hágengu
brokki á þeirri síðustu.
07.01.2011
Árið hófst með veðuráhlaupi. Það er búið að vera vont
veður í gær og dag, skólum frestað og lítið um samgöngur.
Veðrið varð ekki eins vont hjá okkur og spáð hafði verið en þó
vont og þá aðallega blint. Það kembdi jafnharðan snjóinn
fyrir útidyrnar í hesthúsinu okkar, þrátt fyrir mokstur, en
snjórinn er upp á þakbrún meðfram húsinu að stórum hluta.
Þegar rofaði til sáum við að það hafði komið gat á þakið á
skálanum en plexiplast sem er í þakinu er orðið mjög veðrað og
gaf sig í storminum. Þegar við fórum að skoða málið var
gatið mun stærra en það sýndist en ekkert annað hafði skemmst.
Það er því bæði snjór úti og inni í skálanum okkar núna!
01.01.2011
Við óskum ykkur öllum gleðilegs nýs
árs og velkomin á nýja fréttasíðu hjá okkur.
Við byrjuðum árið á því að skrá fjögur ný hross inn á
sölusíðuna okkur. Þau eru
moldótt, bleikálótt, fífilbleikskjótt m. vagl í auga og
rauðskjótt blesótt.
Hrossin hér að ofan er öll að finna á
sölusíðunni okkar.
Smellið hér til að skoða fréttir
2010
Smellið hér til að skoða
fréttir 2009 Smellið hér til að skoða
fréttir 2006-2008 Smellið hér til að skoða eldri
fréttir frá 2006
|
