Þessi síða heitir í höfuðið á Hallveigu vinkonu minni og samstarfsfélaga. Við Hallveig erum vinir í "fjarbúð" og hittumst alltof sjaldan, deilum sameiginlegum áhugamálum og eitt af þeim er íslenska ullin (og kjötið sem hana nærir).
Öll verkin á síðunni eru unnin af Önnu Guðrúnu, prjónakerlingu í Fornhaga II, nema að annað sé tekið fram.

Prjónað:  Nóv. og des. 2011

Efni: Plötulopi, tvöfaldur

Uppskrift: Anna Guðrún
Prikkmynstur: Anna, Auðunn Orri og Ævar Ottó

Jólagjafir til ættingja um jól en ein 28 pör af slíkum vettlingum voru í jólapökkunum þetta árið

Prjónað:  mars - apríl 2011

Efni: Plötulopi, tvöfaldur

Uppskrift:  Ístex

Hluti af fermingargjöf fyrir Aron Ými sem fermdur var á pálmasunnudag (17.04.2011).  Skemmtilega öðruvísi peysa og pínu í víkingastíl.

Prjónað:  Nóv. og des. 2010

Efni: Plötulopi, tvöfaldur

Uppskriftir:  Ístex

Prjónað á þá bræður Auðunn Orra og Ævar Ottó í árslok 2010. Peysurnar eru báðar með rennilás að framan og mynsturbekk líka að neðan. Ævars peysa er svo með flískraga saumuðum innan í hálsmálið.

Uppgert: Apríl 2010

Efni: Gamalt viðarsófaborð, sandpappír og tveir baukar föndurspreylakk (silkimatt, appelgreen).

Hugmynd: Anna Guðrún

Gamla sófaborðið okkar úr Rúmfatalagernum man orðið tímana tvenna.  Það mun vera ca 10-12 ára gamalt og hefur verið í fjórum litum.  Nú síðast fært í þennan eplagræna lit með spreyi sem fæst í Litalandi. Verð á breytingunni var 2.200,- og tók 40 mín. að breyta borðinu úr fagurbláu í þennan eplagræna lit. Áferðin er silkimött, mjög fallegt og auðvelt að þrífa.  Mæli með þessu :o)

Prjónað: Des. 2009

Efni: Plötulopi, tvöfaldur

Uppskrift: Anna Guðrún

Mynstur: Anna Guðrún og Ævar Ottó

Prjónaðir sérstaklega fyrir Ævar á aðventunni og hafa verið mikið notaðir á stuttum tíma.  Það er eitthvað svo hlýtt og jólalegt við þessa litlu jólasveina-vettlinga. Mynstur er saumað í eftirá.

Prjónað: Nóv. 2009

Efni: Plötulopi, þrefaldur

Uppskrift:  Anna Guðrún

Mynstur:  Anna Guðrún og Auðunn Orri

Vettlingarnir eru prjónaðir úr eintómum afgöngum og má sjá að t.d. náðist ekki að hafa báða vísifingurna samlita :o)  Auðunn Orri, sem á vettlingana og lét prjóna þá fyrir sig, saumaði sjálfur broskarlana á handarbökin. 

Prjónað: Des. 2009

Efni: Hespulopi

Uppskrift: Anna Guðrún

Mynstur: Anna Guðrún og Auðunn Orri

Svartir belgvettlingar með ísaumuðu mynstri af hrútshaus.
 

Bökuðum í des. 100 stk. af laufabrauðskökum fyrir okkur fjögur.  Það þykir sumum mikið og líka óþarfa sérviska að kaupa ekki bara kökur og steikja. En við erum jú bæði ættuð úr Svarfaðardalnum og ömmur okkar beggja sjálfsagt lagt grunninn að þessu handverki.  Uppskriftin er sem sagt frá mömmu, sem fékk hana hjá mömmu sinni o.s.frv.  Kökurnar eru frekar þykkar miðað við hvað gengur og gerist og svo hitum við kúmenið með mjólkinni og sigtum frá.  Það er bara eitthvað við þetta laufabrauð sem ekki fæst keypt fyrir nokkurt fé.  Það er nú samt alltaf töluverður léttir þegar þessu er lokið fyrir hver jól og enn meiri léttir að geta gætt sér á afurðinni.  Kakan á myndinni var kaka númer eitthundrað....og mynstrið í anda þreyttra bakara :o)  stutt og laggott.

Unnið af: Önnu, Arnari, Auðuni og Ævari

Prjónað: Nóv. 2009

Efni: Plötulopi, þrefaldur

Uppskrift:  Anna Guðrún

Mynstur:  Anna Guðrún

Vettlingarnir eru prjónaðir fyrir eigandann Ævar Ottó, sem fannst ótrúlega ósanngjarnt að mamma hans skyldi prjóna fyrir alla aðra en hann.

Prjónað:  Des. 2009

Efni: Hespulopi

Uppskrift: Lopi og Band

Mynstur:  Lopi og Band

Annað:  Tölur úr járni, fást í Anney í Sunnuhlíð, Akureyri.  Frávik frá uppskrift eru þau að köðlum á ermum er sleppt.  Á peysunni er einn kaðall á baki og tveir að framan, á sitthvorum boðungnum.  Fæ vonandi myndir af eigandanum í henni síðar og set hér inn.  Peysan er dökkgræn með grænu, gráu og svörtu mynstri.

Prjónað fyrir Dönu Ýri, handa Robin

Prjónað:  2005

Efni: Plötulopi, tvöfaldur

Uppskrift: Anna Guðrún

Mynstur:  Anna Guðrún

Annað:  Á neðri myndinni er handunnin járnnæla sem heldur slánni saman.  Hún er smíðuð af Ingu Maríu, systur minni, sem hefur lagt stund á eldsmíði og hannar og smíðar nytjahluti úr járni.

Prjónað fyrir Ingu Maríu.

Fyrirsæta:  Dana Ýr (í júlí 2005, þá tæplega 17 ára)

Unnið: 2001

Teiknað af Önnu Guðrúnu
Sagað út af Atla mági mínum
Bæsað af Önnu Guðrúnu

Þessi skemmtilegi hesthaus er sagaður út í hnausþykka límtrésplötu sem eitt sinn var skurðarbretti.  Ég teiknaði þennan hesthaus upphaflega fyrir Atla mág minn, sem notaði módelið til að saga út klukkur.  Svo fann ég þessa tréplötu hjá mér og Atli sagaði hana út fyrir mig.  Skemmtilegur kvistur í augastað. Faxið er síðan bæsað á hestinn.  Glærlakkað yfir og notast sem veggskraut.

Málað: 2001

Málari: Anna Guðrún

Pastellitir á striga og myndin er máluð með pottasvampi og fingrunum (engum pensli). Skemmtilega skrítin mynd sem mér þykir afar vænt um.  Hún var máluð í þeim einum tilgangi að nýta veggpláss sem engan tilgang annan hafði.  Dökki ramminn er málaður á strigann og því er enginn annar rammi en blindramminn.

Málað: 1998

Málari: Anna Guðrún

Vatnslitir á pappír - notað salt til að framkalla kristallamyndun í bakgrunni. Dýrin máluð með Windsor vatnslitum og svæðið þakið eins og um þekjuliti sé að ræða.  Unnið með mjög litlum pennsli og afar seinlegt en skemmtilegt.  Þessar myndir eins og hestamyndin voru málaðar til að nota veggpláss sem vantaði eitthvað á.  Þessar myndir ættu að fá þann sóma að verða settar í sér ramma, hver fyrir sig.  Hef það í huga í næstu rammakaupum.

Prjónað: 1998

Efni: Bómullarband

Uppskrift: Eitthvert ísl. prjónablað

Þennan skírnarkjól prjónaði ég þegar ég gekk með frumburðinn, Auðunn Orra. Kjóllinn er með klauf í hálsmáli á baki og honum fylgir líka húfa (ekki á mynd). Kjóllinn er mjög síður og þungur enda þykkur og mjög fallegur.  Hann er beinhvítur og allur prjónaður í perluprjóni auk mynsturs. 

Módel: Ævar Ottó fæddur í mars 2006 á skírnardaginn, 20. apríl 2006.

Bræðurnir Auðunn Orri og ÆVar Ottó voru báði skírðir í kjólnum.