12.02.2010
Auðunn og Ævar skoða ærnar í desember.
Í kvöld kom Gunnar í Sandfellshaga til okkar og taldi í ánum.  Það kom vel út, engin geld, 9 af 10 eru tvílembdar og ein þrímlembd.  Það eru tvö lömb umfram það sem við látum ganga með ánum þannig að það verður því einhver tilfærsla í vor ef öll lömbin lifa.  Þá hefur litla skottið hún Dimma Lambásdóttir '09 líklega fengið við sæðishrútnum honum Dökkva (miðað við stærð fóstranna) og tvær fengnar við Lambás sjálfum, 5 fengu við Stórakoll hans Guðmundar í Garðshorni og tvær við Spotta lambhrútnum sem við notuðum.  Vorið ætti því að færa okkur 21 lamb úr þessum fáu rollum.

24.01.2010
Í dag flutti Spotti heimili sitt frá Fornhaga II yfir í Stóra-Dunhaga.  Spotti sem var svona uppbeiðslishrútur hjá okkur, hafði lokið sínu verki á Fornhagabúinu og eftir að hafa haft allan sinn tíma í ánum hjá okkur, gáfum við Árna og Boggu hann til hverslags nytja.  Það fækkaði því um eitt á fóðrum í dag :o)

02.12.2009
Lambás "Dýri" frá Sveinungsvík.
"Fyrsti í fangi" var í dag.  Tvær af ám búsins voru leiddar undir gullmolann Lambás frá Sveinungsvík.  Þarna á tæplega við að tala um gullklump, því svo fínlegur er hann karlinn.  Benni í Auðbrekku kom með sínar ær til okkar og voru þessar tilhleypingar því samvinnuverkefni tveggja "stórsauðfjárræktarbúa" í sveitinni.  Þetta var engu líkara en um einn dýrasta stóðhest landsins væri um að ræða...sérsmíðað faratæki, svíta á Syðri-Bægisá og nafnið á karlinum á hurðinni.  Skemmtilegt :o)

16.11.2009
Tókum ærnar inn í gær en áður voru komin á hús Spotti lambhrútur og Dimma lambadrottning. Spotti fékk líf fyrir það eitt að mæta síðastur heim að þessu hausti og á að gagnast ánum sem ekki verða settar í sérstakt ræktunarbótaferli. Árni í Stóra-Dunhaga kom og rúði í dag og svampaðar tvær, þær Synd og Skömm sem fara undir Lambás þann 2. des. n.k. Við ætlum að prófa að láta sæða Dimmu (þó ung sé) og sjá hvort við náum nýju blóði í þann stofn.  Annars er skýrsluhaldinu lokið, meðalvigtin 17,4 kg. eftir að smádilkunum var lógað, 2,33 lömb á á, sem flestum þykir gott nema okkur sem höfum ekkert með svo mikið af lömbum að gera. Þrjú lömb og ein rolla farin í reyk og því fer að syttast í jólakjetið.  Tvær rollur voru felldar þetta haustið, þær Svarthvít og Gríma og því fækkaði verulega í mislitastofninum en nú eru einungis mislitar þær mæðgur Skömm og Dimma.

22.09.2009

Hlutirnir gerast hratt í sauðfjárræktinni, ólíkt hrossunum.  Arnar byrjaði í sinni sauðfjárrækt sl. haust og nú í vor fékk hann fyrsta ávöxt þess ræktunarstarfs.  Skömm '08 hans bar tveimur gimbrum, svartri og gulkolóttri, við Lambás frá Sveinungsvík (hundraðogfimmþúsundkallinn), fyrst allra áa til þess. Sú svarta fékk að njóta móður sinnar í sumar og var sem sagt lamb nr. eitt í Fornhaga og var strax ákveðið að hún fengi líf að hausti, kæmi hún heim.  Í dag var svo uppskeruhátíð þegar Arnar fékk dóm á grimbrina (sem hefur hlotið nafnið Dimma) og var heldur en ekki kátur með niðurstöðuna.  Dimma hlaut 33 í vöðva, 2,2 í fitu, 4,5 fyrir lögun, 9,5 fyrir frampart, 19,0 fyrir læri og 8,0 fyrir ull!  Það voru þá heldur engar smá tölur á kerlingunni :o) Alls hlaut hún 36,5 stig sem hlýtur að teljast verulega gott.  Þar með setti hann okkur hin langt aftur fyrir sig og verðum við nú að sýna kænsku og reyna að klóra í bakkann að ári (sæða, sæða).  Frábær dagur fyrir Arnar og Dimmu lambadrottningu.  Spurning hvort hún þurfi hreinlega ekki að fá sér herbergi í vetur!

21.09.2009
Kollheimt í Fornhaga II.
Þá er allt komið heim og líkt og í fyrra skiluðu sér allir hausar heim (fyrir rest).  Í seinni göngum fengum við Grímu með lömbum en hún var í Auðbrekkufjallinu og hafðist heim með erfiðismunum þó!  Skömm og Dimma voru hinsvegar komnar alla leið yfir í Skriðu, þar fyrir ofan túngirðingu.  Þær urðu einhverra hluta eftir í seinni göngunum líka og fór Gísli nágranni í Tungu og opnaði fyrir þeim niður á tún í Skriðu og þangað sóttum við þær, í félagsskap við Gísla, og rákum heim í Fornhaga. 

Eftir 17 dilka er meðalvigtin 18 kg. og slátruðum við núna þremur vikum fyrr en á síðasta ári.  Eigum eftir að slátra þrem lömbum (þar af tveim afar smáum og einu vænu).  Ein rolla fær að fara líka, Dimma sett á svo að hausafjöldinn verður sá sami næsta vetur - 11 ær.

15.09.2009
Göngur, réttir og slátrun.
Þá eru haustverkin komin á fullt. Fyrri göngum lokið og heimtum við frekar illa miðað við fjárfjölda.  Af 11 ám vantar okkur ennþá tvær ær með lömbum, þær Grímu og Skömm.  Allar "Strandakindurnar" okkar komu í fyrri göngum, eins og í fyrra :o)  Í gær var svo vigtað og í dag slátrað einum 17 dilkum.  Tvö smærri lömb fá að bíða seinni slátrunar en ein ærin okkar, sem fór með tvö lömb á fjall og var einspena, hefur hætt fljótlega að sinna sínu mjólkurhlutverki og það sást vel á lömbunum.  Hún fær því að fara til feðranna síðar í haust um leið og lömbin.  Nú er bara að bíða þess að fá eitthvað af hausum í seinni göngum og vonandi að heimta ásetningsgimbrina okkar, hana Dimmu Lambásdóttur, sem enn hleypur einhversstaðar um fjöllin ásamt móður sinni henni Skömm.

19.05.2009


Ja, blessað fólkið sem hugsar svona (sjá mynd hér að ofan). Það er auðvitað miklu betra að kaupa kjötið í BÚÐ sem framleiðir kjöt heldur en að lóga dýrum til að "borða" þau :o)  Þessi úrklippa hlýtur að hafa slegið í gegn í amerísku slúðurblaði.  Hún "lyktar" einhvern veginn þannig.  Hvað um það, ef ekki verða náttúruhamfarir ættu að vera fullar frystikistur af lambakjöti í Fornhaga í haust, heimaslátruðu, og alls ekki "keyptu" í búðinni sem "býr" til kjötið :o)  Hlökkum til haustsins.

18.05.2009
Þá lauk sauðburði í Fornhaga II í nótt. Brúða bar síðust, tveim risastórum alhvítum lömbum, hrút og gimbur. Hefur heilt yfir gengið vel hjá okkur en misstum þó eitt gemlingslamb og einn þrílembing. Þrjár ær af níu voru þrílembdar og annar gemlingurinn okkar var tvílembdur svo að nóg var af lömbununum sem voru þó gefin til nágranna vorra í Skriðu, þ.e. tveir þrílembingar og tvílembingur undan gemlingi. Eitt lamb fengum við svo hjá þeim til að venja undir gemlinginn sem missti þannig að þetta er allt eins og blómstrið eina.  Allar ærnar ganga með tvö lömb og gemlingarnir báðir með eitt lamb. Það eru þá 20 lömb sem fylgja þessum 11 ám en fæddust hjá okkur 24.

25.04.2009
Gríma bar hrút og gimbur í dag - bæði alhvít.

24.04.2009
Dásamlegur tími hafinn - sauðburður!
Skömm bar tveim gimbrum í dag - svartri og hvítkolóttri sem væntanlega verða hyrndar þar sem báðir foreldrar eru það. Þessar tvær gimbrar eru undan Lambás frá Sveinungsvík. Sú kolótta fékk nýtt heimili og "fóstru" í Skriðu enda algerlega upprunin þaðan. Skömm er sem sagt frá Skriðu og þangað fór hún einnig undir Lambás og gimbrin kolótta er því nánast komin "heim".

05.04.2009

Klipptum klaufir á kindunum og það mátti nú alls ekki seinna vera því ræflarnir voru orðnar ansi vaxnar. Svarthvít var svona pínu fyrirkvíðanlegt verkefni þar sem hún er allra kinda brjáluðust.. en viti menn!  Hún stóð eins og stytta og leyfði mér að klippa sig allan hringinn án þess að hjóla í mig margsinnis (en það er svona vanalegra).  Hún er hins vegar með slæma ígerð í júgranu og það er því höfuðverkur þessa sauðburðar að finna lömbunum hennar nýjar mæður en hún er þrílembd.  En svona til að vera ekki alveg með geislabaug hjólaði hún í Ævar, þar sem hann stóð í garðanum, og var lítt kátur með hennar háttarlag.  Bólusettum svo gemlingana (seinni umferð) og bárum hálm í króna þannig að nú er allt í sóma og blóma í fjármálunum.

24.03.2009
Bólusett! Það er brjálað að gera í fjármálunum hjá okkur með allar þessar 11 kindur!  Anna, Auðunn og Ævar brustu í það að bólusetja ærnar bæði með lambablóðsóttarlyfi og seleni.  Ævar (3 ára) skældi mest allan tímann og stundi á milli ekkasoganna: "Ekki stinga mína kind"....!  En hans kind slapp ekki frekar en aðrar og allar fengu þær sinn skammt af bóluefnunum.

23.03.2009
Rúið! Og enn og einu sinni kom Þór í Skriðu og strippaði snoðið af ærstofninum.  Þessar síður en svo spöku ær í Fornhaga II eru ekki í neinu uppáhaldi hjá honum þegar kemur að rúningi og spurning hvort við þurfum að fara að beita svona "bónusgreiðslum" til að lokka hann til starfans. Hvað um það, hann lét sig hafa það eitt vorið enn að rýja þessar elskur sem samkvæmt venjunni börðust um á hæl og hnakka og gáfu hvergi eftir.  "Fé er jafnan fóstra líkt" og í þessu tilviki er það alveg á hreinu að þessar ær tilheyra húsfrúnni á bænum :o) enda hefur hún það að mottói að það sem maður getur ekki gert með hugvitinu og aflinu einu saman er gott að bæta þráanum við....þá kemur þetta á endanum.

22.03.2009
Svarthvít með lömbin sín tvö vorið 2008.
Þrílemburnar okkar þjár fengu sér herbergi í dag. Það eru þær Svarthvít, Prýði og Pæja sem eiga von á alls 9 lömbum og því ákváðum við að gera vel við þær og setja þær í sér spil.  Þetta var nú hugsað svo að þær hefðu meira pláss, meiri frið til að éta og meira næði.  En við vorum varla búin að setja spilið í króna þegar Svarthvít byrjaði að labba uppá hinum tveim og réðist svo á Pæju og stangaði hana af öllu afli í bumbuna.  Svarthvít blessunin kann ekkert að meta þetta góðverk og þar sem hún getur ekki haft neitt á hornum sér (enda kollótt) þá nýtur hún þess að pynta samborgara sína í þessu fjárhagslífi eins mikið og auðið er.  Hún færði sig sem sagt einu skrefi nær pottinum þarna í dag en sökum þess hve stórspena hún er, er hún líklegri en aðrar ær hjá okkur til að lenda þar í haust.  Það er heldur ekki hægt að ætlast til að aðrar ær beri hana mikið á bakinu enda hefur hún vigtað rúmlega 80 kg. tvö sl. haust og engin léttavara.

15.02.2009
Það er gaman þegar vel gengur í kynbótastarfinu en stundum gengur bara ofvel...eins og við fengum að vita í dag þegar Gunnar í Sandfellshaga kom til okkar og "taldi" í ánum.  Við komum til með að fá 24 lömb úr 11 ám (þar af tveir gemlingar) og eru þrjár þrílembdar og annar gemlingurinn einlembdur en rest með tvö hver.  Það er eiginlega svona fjórum lömbum of mikið því best er að hafa þær bara tvílembdar og gemsurnar litlu einlembdar.  Það verður því hlaupið á milli bæja í vor til að vita hvort hægt verði að koma umfram lömbunum undir ær. Það má því með sanni segja að Blettur frá Skriðu hafi markað spor sín duglega í frjósemisræktunina hjá okkur...og við sem héldum að hann næði ekki að lemba stóru fullorðnu ærnar en eins og þeir sem til þekkja vita...þá eru ærnar í Fornhaga II MJÖG stórar :o) og ekkert auðvelt verkefni fyrir lambhrút endilega að gagnast þeim. Við þessa talningu kom í ljós að eina ærin sem við létum sæða, hún Brúða, hefur greinilega beitt upp og fengið við honum Blett sem verður til þess að hún verður með þeim síðustu að bera.

18.01.2008
Blettur tekinn úr ánum.  Fékk allan "sinn" tíma og vel það. 

12.01.2009
     
Jæja nýtt ár framundan og nú ætti að vera komið fang í flestar ær, hafi svo vel tekist til. Rakst á þessa skemmtilegu upptalningu á netinu á dögunum.  Leyfi ykkur að njóta:
Blóðhiti sauðfjár er 39,0 ºC
Blóðhiti lamba getur verið á bilinu 38,5-40,5ºC
Æðarslög eru á bilinu 70-80 á mínútu
Tíðni öndunar er á bilinu 15-25 á mínútu
Gangmál er 48 klst (24-72)
Tími milli gangmála er 16,5 dagar (14-19)
Meðganga er 143 dagar (138-148)

12.12.2008

Á vordögum fór Fálki kynbótahrútur yfir í Dagverðartungu.  Fálki var harðsnúinn skrattakollur sem hafði þó ekkert á hornum sér enda kollóttur eða hnýflóttur sem var nú enn síðra. Fálki var sérdeilis mikill hlunkur, vigtaði 104 kg. veturgamall og skilaði þungum dilkum hjá sauðfjárbændum Fornhagabúsins.  Eftir tveggja vetra notkun ákváðum við þó að nú væri nóg komið af þess slags kynbótum og afhentum hann til nágranna vorra í Dagverðartungu.  Ekki náði Fálki þó að gera neinn óskunda í ræktuninni þar og var í haust sendur til feðranna.  Gísli í Tungu talaði um það í upphafi (þegar hann fékk hrútskömmina) að við myndum þá alla vegana éta hann í sameiningu, ef ekkert annað yrði hægt að gera við gripinn.  Nú þegar hér er komið við sögu var sem sagt "ekkert annað hægt að gera við gripinn" og fyrir skemmstu birtist Gísli með hangið læri af Fálka og færði húsfreyjunni í Fornhaga II að gjöf.  Húsfreyjan sú, sem hefur ekki lagt það í vana sinn að éta hrúta mikið eldri en lambsárið, fékk það resept frá Gísla að þetta skyldi hún og hennar fólk snæða með opnum huga.  Það liggur því fyrir á jólaföstunni að snæða "Fálkakjöt" með "opnum huga" a la Gísli í Tungu.

07.12.2008
Blettur settur í restina af ánum...

02.12.2008
Blettur, sem er kollóttur kynbótahrútur frá Skriðu, fékk að hitta fyrstu ærnar í dag.  Það voru þær Synd og Gríma en einnig kom til hans lítil skvísa frá Skriðubúinu.

30.11.2008
Skömm fór undir hinn fræga Lambás frá Sveinungsvík í dag og fékk fyrsta "hal".

05.11.2008
Rúið! ...alveg inn að skinni :o)

31.10.2008
Féð tekið á hús.

04.10.2008

Slátrað í dag 15 skrokkum og meðalvigtin 18,4 kg. sem er alveg ásættanlegt. Þennan sama dag fóru félagar í Fjárræktarfélaginu Neista (sem er okkar félag) á hrútadaginn á Raufarhöfn og keyptu í nafni félagsins "metfé" sem er lambhrútur frá Sveinungsvík en sá er með 10 fyrir bak og eitthvað fleira fallegt.  Fyrir hrútinn voru greiddar 105.000,- og það eitt og sér er bara skemmtilegt.  Hrúturinn verður síðan seldur út með sama kerfi og stóðhestur, tvö tímabil og allt það.

01.10.2008
Óli Vagns og Helgi á Syðri-Bægisá ábúðarfullir á svip.
Hrútasýning í Skriðu.  Að sjálfsögðu stormuðum við öll fjölskyldan á þennan merkis viðburð en athygli skal vakin á því að það var fleira fólk á þessari hrútasýningu en á réttarballinu í haust!  Skemmtilegast við þetta allt var að "karlarnir" í sveitinni sem vita ALLT um rollurassa og digurlega vaxna kynbótahrúta, kunnu sér vart takmörk og tróðust þarna hver fyrir framan annan, til að sjá og þukla, leggja sitt af mörkum og þenja kassann.  Þetta var eiginlega bráðfyndið en við "hin" sem höfðum okkur minna í frammi, sáum varla einn einasta hrút fyrir fólki og því var þessi "hrútasýning" meira svona "hrútadómahlustun" enda var það eina leiðin til að vita hvað fram fór í þvögunni.  Hvað um það, Skriðubændur gerðu það gott og áttu sigurhrútana bæði í flokki lambhrúta og veturgamalla hrúta.  Til hamingju Þór og Sigga. Kíkið á heimasíðuna þeirra undir sauðfé til að sjá myndir frá sýningunni.

23.09.2008
Vigtað og metið.

Þetta var dagur mikilla fjármála.  Vigtað og 7 gimbrum keyrt í Skriðu til "dóms".  Þar kom vel út ein stór og mikil gimbur undan henni Brúðu og fékk hún nýtt heimilsfang þennan sama dag en þá flutti hún til Þórs og Siggu í Skriðu.  Arnar fékk svo í staðinn hana Skömm frá Skriðu en hún er gráflekkótt og hrynd og stangast þannig verulega á við ræktunarstefnu frúarinnar...sem að sjálfsögðu sá um í staðin að gefa þessari annars fallegu kind nafnið Skömm.  

14.09.2008

Féð allt komið heim.  Fengum allt okkar fé heim í fyrri göngum (100% heimtur).  Ein ær með tveim lömbum kom á Reistarárrétt en annað kom allt í Þorvaldsdalsrétt. Féð ágætlega vænt svo að við erum alveg sátt við okkar.

13.09.2008
Göngur og réttir.  Við áttum dagsverk á Illagilsdal (í seinni göngum) en þar sem Anna göngugarpur hafði ekki gengið þar áður ákvað hún að skella sér þangað líka í fyrri göngur...bara til að skanna svæðið :o)
Hitinn var 17°C og sól í fyrri göngunum og féð í hæstu hæðum og langaði ekkert heim. 
 

Féð rennur niður Fornhagaöxlina á leið til réttar.	Komið til byggða eftir vel heppnaðan gangnadag í sól og hita.	...og nú nálgast skjáturnar...
Féð á leið til réttar yfir Ytri-Tunguána.	Ævari leiddist biðin eftir safninu.	Þessi er greinilega frá Árna í Stóra-Dunhaga.
Arnar og Ævar kíkja yfir safnið í réttinni.	Hulda, Birta og Inga í Litla-Dunhaga.	Voru eingöngu konur að draga féð í réttunum?
Jósavin í Litla-Dunhaga kátur með daginn.	Simmi á Björgum fékk kindur á réttina.	Doddi frá Þríhyrningi fær sér í svanginn á réttinni.

09.05.2008
...og svo bar síðasta kindin.

25.04.2008
...og þá bar fyrsta kindin. 

18.04.2008
Snoðið tekið - það verður ekki fært hér á prent hvað það tók fljótt af!  Líklega hefur eitthvert áður skráð hraðamet verið slegið í þessum rúningi enda Þór rúningsmaður um það bil að missa af úrslitaþættinum í "Bandinu hans Bubba" og hafði því nauman tíma til verksins.

31.03.2008
Metfé með lærin í skónum.....kíkið á sauðfjárpistil dagsins.

30.03.2008

Fálki fluttur að heiman og færði lögheimili sitt yfir í Dagverðartungu um helgina.  Þessi yfirvigtarkappi hafði þó markað spor sín hraustlega í ræktuninni í Fornhaga því metvigt var á lömbunum í haust, sem þó voru bara gemlingslömb og allt tvílembingar.  Gaman að sjá hvað lömbin undan honum á þessu vori gefa okkur í haust í kg. 

17.02.2008
Gríma frá Skriðu
Afleiðing helgarinnar - versluðum með eigið metfé!   Það voru sem sagt ekki gerð hestakaup þessa helgina heldur fórum við í "rollukaup" sem er ekki síður skemmtilegt.  Þór í Skriðu (sem átti frumkvæðið á þessum kroppaskiptum) fékk hana Krullu frá Reykhólum og við fengum Grímu frá Skriðu.  Passamynd væntanleg.

09.02.2008

Fornhagaféð að sónun lokinni.  Verið að sóna í Skriðu.
Sónað!  Allir 10 kvennkropparnir sónaðir til að kanna fjölda lamba.  Það kom nú mjög vel út og í þessum 7 ám og 3 gemlingum voru 19 fóstur....aðeins einn gemlingur með eitt og allt hitt tvílembt.  Það er ekki laust við að húsfrúin hafi verið bara nokkuð montin af þessari niðurstöðu.  Svo verður að bíða og sjá hvort þessi lambafjöldi muni skila sér í fæddum lömbum að vori.  Kemur allt í ljós.  Það var sem sagt sónað í Skriðu, Lönguhlíð og Fornhaga og vaskur hópur fór bæ af bæ til að allt gengi sem hraðast fyrir sig.

13.01.2008
Hrúturinn tekinn úr - ásetningsmerki sett í lífgimbrarnar og hrútinn (sem loksins hætti að vera með stelpueyrnalokk!).  Allir komnir í nýja leikhúsið en hið eldra hefur verið rifið enda komið hesthús þar sem það stóð.  Myndasmiðurinn þarf greinilega að munda vélina og setja inn mynd af herlegheitunum.

07.12.2007
Hrúturinn kominn í ærnar.  Hann eiginlega bjargaði sér um það sjálfur og fyrst að hann hafði sig yfir til þeirra....vorum við ekkert að ergja hann á því að taka hann til baka.  Það er bara svona þegar ástin grípur unglingana!

04.11.2007
Rúið - allir kroppar orðnir berrassaðir!  7 ær, 3 lömb og hrússinn.

06.10.2007
Slátrun - 4 lömb (allt tvílembingar undan gemlingum) og meðalvigtin 16,6 kg.

05.10.2007

Vigtað!  Allir í vogina...með góðu eða illu.  Fálki meira klæddi sig svona í vigtina...eða þannig...enda vigtaði kappinn 104 kg. veturgamall og það þótti fjárbændum í Fornhaga bara alls ekkert leiðinlegt.


Klói (kötturinn á bænum) fór á kostum á vigtardaginn og lét gibburnar alveg vita það að þetta væri hans hús!  Hingað til hafi hann búið einn í því og var ekkert að gera sér dælt við þessar gemsur heldur slæmdi bara klónum í þær.  En í einni sveiflunni datt hann næstum ofan í króna en náði að bjarga sér naumlega eins og meðfylgjandi myndir sýna.

23.09.2007
Féð rekið inn og líflömbin valin.  Það fá þrjár stórglæsilegar hvítkollóttar gimbrar að lifa og því fara fjórar í slátur.  Líflömbum, ám og hrút gefið ormalyf.

02.06.2007
Eftir langt og kalt vor er loksins búið að sleppa kindunum á grænt gras.  Klipptar klaufir og gefið ormalyf áður en lagt var af stað út í síðbúið vorið.

23.05.2007

Það er líf og fjör hjá lömbunum þegar mæðurnar skella sér í hádegismat!

01.05.2007

Einmuna veðurblíða hefur verið undanfarna daga.  Þarna má sjá Bylgju (1v.) með lömbin sín tvö þær Prinsessu og Perlu.  Þeim var eiginlega um og ó í 25 stiga hitapolli sem myndaðist við skálann hjá okkur.

24.04.2007
Fengum fyrstu lömbin í dag, tvær hvítar gimbrar, önnur mjög stór og hin minni.  Þarna komu ásetningsgimbrarnar enda undan stærstu kindinni sem er mikil móðir og stendur sig með stakri prýði svona miðað við að vera aðeins veturgömul.  Reyndar hafði ein borið áður (11.04.) en því miður náði lambið ekki að lifa það ferðalag af og var dautt þegar það kom í heiminn.

26.03.2007
 

Fjárhirðarnir Auðunn og Ævar ....	..sem fara allra sinna ferða á hjólum...	Gemsur með kvöldgjöfina sína.
Fálki kynbótahrútur frá Reykhólum.	Gjafatími....	Ævar glaður með sitt í húsunum.

Það er vorlegt úti.  Rigning og stilla.  Fórum í gær að undirbúa fæðingardeildina í Fornhaga fyrir væntanlegar lambasteikur.  Ekki fær smíðin nein fegurðarverðlaun enda efniviðurinn vörubretti og gamlar hurðir....en notagildið er ótvírætt.  Það er það sem skiptir máli.  Sýnist að ef við verðum heppin bera 6 gimbrar af þeim 7 sem þarna eru.  Svarthvít blessunin sem hrúturinn ætlaði að senda til himna í desember....er líklega geld enda var hún mestan tímann fjarri hrútskömminni....ein í spili.  Þannig að 6 gemsur fá þá 4 herbergi til að deila með sér á fæðingardeildinni. 

 

Tófan hefur jafn mikinn áhuga á fénu og við.  Nýverið voru tófuspor allt í kringum skálann og ætlaði láfóta sennilegast að ná sér í steik í gogginn.  En sem betur fer komst hún ekki inn í húsið og nú hafa skyttur sveitarinnar fengið boð um dýrið sem á sér sjálfsagt ekki viðreisnar von.  Á döfinni er sem sagt að lóga hrút nágrannans, leggja hann sem agn á grundir Fornhaga II og sitja fyrir saklausu dýrinu.  Það er víst af nógu að taka enda greni í fjallinu fyrir ofan hjá okkur og því verður sjálfsagt kapphlaup í sumar um lömbin, þ.e. í hvaða maga þau lenda....okkar eða tófunnar.

19.03.2007

Rúið!  Bóngóðir nágrannar halda áfram að gera okkur lífið auðvelt í sveitinni.  Að þessu sinni (eins og svo oft áður) var það Þór bóndi í Skriðu sem kom og klippti "snoðið" af gemsunum.  Berrassarðir gemlingar stripplast því um í "brúðuleikhúsinu" þessa dagana.  Sennilegast ekki nema mánuður í burð hjá okkur og nú syttist í að steikur hoppi um öll tún!

09.12.2006

Þá hafa kindurnar flutt í nýja hýbýlið sitt.  Stundum kallað brúðuleikhúsið þar sem þær eru girtar af með segli og öllu tilheyrandi til að passa uppá hitann hjá þeim.  Bráðabirgðasmíðin, króin þeirra, varð að miklu mannvirki sem mun sjálfsagt standa lengur en húsakosturinn sjálfur.  Uppi á annari hæð, með skíthúsi og öllu, hafa þær það virkilega gott og nú á smáfólkið auðvelt með að kíkja á þær og gogga að þeim ýmsu góðgæti. Þær eru nú þegar orðnar sérlega hrifnar af brauði og ætli jólagjöfin þeirra í ár verði þá ekki 5 korna rúgbrauð frá Brauðgerð Kristjáns.  Það finnst þeim sérlega gott sem og eigendum þeirra.  Frábært og næringarríkt brauð.

30.11.2006
Raunir sauðfjárbænda....
Hverjum hefði dottið í hug að sauðfé sé fullt af fordómum?  Það fengum við að reyna á dögunum.  Hrútnum hefur verið sleppt í allar 7 gimbrarnar...jú dálítið snemma en það gerir aðstöðuleysið sem hrjáir okkur um þessar mundir.  Hvað um það...það er nóg pláss fyrir kærkomin lömb í apríl.  Nema hvað.  Hrúturinn ákvað að Svarthvít væri eitthvað öðruvísi en hinar aflituðu gemmsurnar og lagði hana í einelti.  Hann náði að slasa hana og gekk margsinnis í skrokk á henni og í eitt skiptið henti hann henni í loft upp!  Lambhrúturinn!!!  Þannig að það virðist ekki skipta máli hvaða spendýr eiga í hlut, sauðfé eður mannfólkið, þeldökkir eiga greinilega erfiðara uppdráttar í þessu samfélagi sama hvað við röflum og tautum.  Þannig að Svarthvít er núna prinsessan á bauninni, fékk einkastofu með sér eldhúsi og ætlar að nota tímann vel til að hvílast og safna kröftum fyrir næstu átök.  Hún fékk líka einhver görótt lyf og smyrsli til að ná sér í ofurkraft eins og Ástríkur og Steinríkur í sögunni.  Hvað hrútinn varðar þá verðum við að þóknast þeim afbrigðilegu hegðunum sem hann hefur uppi í sínu kynlífi....annars verður jú engin steik á borðum næsta haust.   Kíkið inn á þennan skemmtilega vef um sauðfé... http://www.sauda.vefurinn.is/

26.11.2006
Fórum í Reykhóla á Barðaströnd til að sækja okkur "metfé" sem síðar mun skaffa vænar steikur á matarborð bænda í Fornhaga II.  Sjö gimbrar og einn hrútur komu í þessari ferð og eru þau öll hvít og kollótt utan hana Svarthvíti sem Auðunn á.  Hún er svört með hvíta leista og kollótt að sjálfsögðu.  Ferðin gekk vel og tók alla helgina enda gistum við hjá Reykhólabændum, þeim Jónasi og Bergljótu, sem eru höfðingjar heim að sækja eins og alltaf. 
 

Tekið á því....Grétar með "metfé" í fanginu.	Jónas, Grétar, Svarthvít og Auðunn.
Metféð komið í Fornhaga II.	Jamm....allar hvítar kollóttar nema Svarthvít.
Auðunn hugar að Svarthvít sinni.	Sveittir, þreyttir og glaðir bændur eftir "ferðafjárlagið".